Jasmira Mora Garces, Coordinador di POH:
ORANJESTAD (AAN): Jasmira Mora Garces, Coördinator POH na Wit Gele Kruis Aruba a duna di conoce cu ta hopi lamentabel cu hende no ta controla y despues e personanan ta haya sorpresa.
E edad di e personanan cu ta constata cu tin sucu halto ta birando mas abao. Esaki ta wordo constata door den praktijk. Hopi biaha ora cu e persona ta sinti su mes malo, nan ta wordo manda na e praktijk, a bisa.
E problema di diabetes, mescos cu cardiovascular ta cu hopi biaha e persona no ta sinti malo. No ta facilmente un hende ta bay haci un chekeo zomaar. "Unda nos si ta gara nan y ta ripara cu cada biaha edad ta birando mas abao ta den e proyecto cu POH ta traha hunto cu Departamento di Salud (DVG) y IBiSA cu yama 'Sa bo number', a indica.
Eynan ta ripara cu na pia di trabao, ora cu ta bay haci chekeo, cu edad ta birando cada bes mas jong y e hendenan no sa. Esey ta e meta di e proyecto aki, di haci un 'random check up' pa asina gara e hendenan y preveni cu den futuro esaki bira mas pio. "Si bo no sa cu bo tin e malesa, bo no ta bay haci nada p'e tampoco, Mora Garces a remarca.
No ta solamente e problema cu sucu, diabetes, pero tambe cu presion halto. Esey ta un combinacion fatal, a agrega.
E grupo di edad aworaki ta entre 30 cu 45 aña. Esey ta edad cu mas tanto ta wak cu e problema cu sucu ta cuminsa presenta su mes y e hendenan hopi biaha door di drukte nan no ta yega na dokter di cas pa haci nan chekeo manera cu mester ta. "Esey ta preocupante", a bisa.
