Gobierno di Aruba a firma MOU pa desaroyo economico sostenibel

ORANJESTAD (AAN): Diabierna atardi, Prome Minister mr. Mike Eman hunto cu Minister di Turismo mr. Wendrick Cicilia,

a reuni cu representantenan di Aruba Hotel and Tourism Association (AHATA), Vacation Rental Professionals of Aruba (VPRA), Aruba Association of Realtors, Aruba Port Authority (APA), Aruba Airport Authority (AAA), y Aruba Tourism Authority (ATA).

   Reconociendo e papel central cu turismo tin den desaroyo economico y social di Aruba y mirando e retonan cu nos isla ta enfrentando riba nivel ambiental, social, infrastructural y economico, Gobierno di Aruba ta haya prudente pa bin cu accion pa cambia e manera di procede. E encuentro cu e stakeholdernan a culmina cu firmamento di un MOU den cual ta haci e compromiso pa busca forma pa haci e cambionan necesario pa un economia mas sostenibel. 

   Cu e compromiso mutuo pa e bon comun, sostenibilidad y bienestar di pueblo Arubano, Gobierno di Aruba y e stakeholdernan presente, a acorda pa establece un compromiso comparti pa participa den un proceso structura di dialogo y colaboracion, cu e obhetivo pa desaroya maneho, acuerdo y iniciativa conhunto pa sigura un caminda mas sostenibel pa futuro di turismo na Aruba.

   Esnan cu a firma e MOU ta Prome Minister Eman, Señora Tisa LaSorte Henriquez di AHATA, Sr. Alex Cybul di VPRA, Señora Ronella Croes di ATA, Sr. Jurgen Benschop di Triple A, Sr. Bruce Franken di APA y Señora Cindy Ruittemanz di Association of Aruba Realtors.