Himno Nacional di Reino Hulandes y e prome tiro politico den historia
- Bida di hende y libertad ta central den un estado democratico
- Urna electoral no por worde reemplaza cu dramamento di sanger
ORANJESTAD (AAN) Riba 10 di Juli 1584, un tiro a resona. Tabata prome biaha den historia cu un arma di candela a wordo uza pa pone fin na bida di un contrincante politico.
Nomber di e victima di e asesinato te awe ta resona ora Arubianonan na uni nan voz den e canto di e Himno di Reino Hulandes, “Wilhelmus van Nassauwe” y ta entrega e historia di e morto di e Prins van Oranje na 1584.
Baltazar Gerards tabata e homber cu a wordo paga pa mata e Prins van Oranje dor di Corona di Spaña cu tabata domina politica di Europa y tambe Hulanda den e guera den cual religion a bira e arma mortal di un Pueblo contra otro.
E Himno Nacional di Reino Hulandes, Wilhelmus, ta e realidad cu ta termina cu un suplica na Dios pa proteccion contra tirania, cu ta destrui curazon di un Pueblo. Mas tristo e fin di Prins van Oranje ta bira, ora tene cuenta cu base di e guera tabata Religion Catolico contra Religion Protestant.
Te awe e grito pa “libertad” ta keda central den e pakete di democracia cu ta sigura bienestar di tur miembro di un comunidad democratico, cu tin e derecho di tin su propio opinion y e derecho pa lucha pa loke den su vista ta corecto.
Ora papia di religion, ora papia di valornan di un comunidad democratico, ta papia di e realidad cu hende a worde crea cu un concenshi y mente cu mester keda liber den un comunidad sigur den e mundo moderno di awe, cu kier deshaci di valornan di pasado y ta uza e sistema politico democratico pa impone nan pensamento ariba loke otro tin derecho pa defende como su balor a base di su concenshi propio.
Atrobe un tiro a resona na Merca, cu den epoca sesenta y ta haci mundo regresa na 22 di November 1963 ora un tiro a pone fin na bida di Presidente John F. Kennedy y a habri e epoca mas grandi di intolerancia poltico den temponan moderno na nivel mundial.
Aki mester papia di intolerancia ya cu tabata trata di un Presidente den un situacion completamente democratico y cu no por sikiera compara cu revolucionnan hasta den region di Caribe y America Latino durante decada 60, contra dictadornan cu a asumi poder dictatorial arma y cu na varios ocasion a wordo reamplaza pa otro dictador den un cultura politico, enemigo di democracia.
E morto di John F. Kennedy a resona den mundo democratico cu e constitucion Mericano ta garantisa.
Na April 1968, Martin Luther King, a perde su bida den su lucha, sigui na Juni 1968 dor di Robert Kennedy, candidato Presidencial di Merca na e momento.
Awe e momentonan aki ta worde recorda na e pais cu pa medio di e Orden di Ley a a adapta su mes na e contenido mas estricto di democracia cu atrobe ta na peligroso dor di avance pensamentonan moderno, cu ta mishi incluso cu moral di hende.
Ora papia di moral, central ta keda e posicion di e hende, cu tin derecho di opone abortus, cu ta pone fin na bida cu ya a haya su inicio como parti fisico di un mama. Mundo democratico te awe no tin un punto comun ariba e tema aki, cu ta pakete di valornan.
Cu honestidad mester admiti cu loke a pasa na Merca ta culminacion di intolerancia y un progreso anti democratico den cual hende cu no kier introduci su cambio den valornan, no por expresa esaki libremente sin wordo acusa y hasta abusa.
Intransigencia y un tipo di mentalidad dictatoral nobo basa no riba militarismo a bira condena di morto di un persona.
Tabata tin expresion cu el a haci den su pakete total, cu mester a exigi segun formulanan democratico pa e coregi. Pero e mester a topa cu e armanan cu el a uza cu ta palabra y comunicacion y no cu arma mortal pa pone un fin na su bida.
Kico e logro ta di dramamento di sanger? Realmente e morto di e hoben a habri wowo pa e forma cu democracia ta wordo trapa den stigmatisacion di personanan cu no ta completamente di acuerdo cu desaroyonan ariba tur tereno cu segun democracia nan tin derecho di opina.
Democracia a duna prueba di ta habri porta pa na un forma democratico defende e libertad humano. Pero no por kibra e derecho di otro, cu no ta di acuerdo cu cambio y ta expresa esaki.
Si el a bay contra leynan por a entrega keho na Polis of inicia un caso civil. Pero kende tin derecho di elimina otro, pasobra e no ta di acuerdo cu su opinion?
Bida di hende tin e balor mas halto cu henter universo conoce. Si e hoben mes a expresa palabra cu no ta di acuerdo cu respet pa bida di hende, e no mester a wordo mata, pero mester a wordo contesta cu e armanan cu democracia ta entrega.
Un nubia scur a presenta na e cielo di mundo moderno, den cual hende kier midi cu e mido cu ta cumbini y ta lubida cu di e forma e ta mata concenshi personal y comunitario, ariba cual democracia ta basa!
Tur hende ta hende. Ningun hende tin e derecho pa mata pasobra ningun hende ta doño di bida ni doño di balornan hancra den democracia!
Ningun hende ta permiti practica tirania, cu e Himno Nacional di Reino Hulandes, ta rechaza!
