Gobierno di Aruba a entrega Presupuesto 2025 na Parlamento

Prome Minister Evelyn Wever-Croes

ORANJESTAD (AAN): Diahuebs 29 di Augustus, 2024, Gobierno di Aruba a entrega Presupuesto 2025 na Parlamento. Prome Minister Evelyn Wever-Croes a expresa cu pa hopi tempo, Gobierno a bin ta traha pa entrega e presupuesto na tempo. P'esey awe e mandatario ta sumamente contento y orguyoso cu Gobierno no solamente a entrega un presupuesto na tempo sino prome cu e fecha di 1 di September manera ley ta stipula. 

            Presupuesto 2025 ta cumpli cu tur e normanan financiero cu a wordo ancra den ley. Prome Minister a indica cu e presupuesto ta conta cu un surplus, cu ta e prome condicion, cu ta bisa cu e presupuesto mester tin un surplus di minimo 1%.

            Den caso aki e presupuesto 2025 tin un surplus di 1.8%, cual ta un muestra cu Aruba financieramente ta riba caminda pa finansas duradero y sostenibel. Tambe e presupuesto ta dentro di e gastonanan di personal, y cu esaki ta bahando e debe di pais Aruba, cu pa 2040 mester yega na 50%. Segun indicacionnan, a base di e presupuesto aki, Gobierno lo yega e 50% ya caba na 2031.

            Prome Minister ta gradici Minister di Finansas Xiomara Maduro pa su vision, su determinacion, su curashi, y su esfuerso pa yuda Gobierno logra esaki. Tambe un danki na Departamento di Finansas, Departamento di Legislacion (DWJZ) pa nan ayudo y asistencia den esaki, y na tur esnan cu di un of otro manera a yuda pa por a termina e presupuesto aki na tempo.

            “Gobierno tin hopi aña ta purba pa caba cu e atraso y logra entrega un presupuesto na tempo. E aña aki no solamente a entreg’e na tempo sino a entrega un presupuesto cu ta cumpli cu tur norma, prome cu tempo. Aruba ta den recuperacion, y awor lo enfoca pa traduci tur e progreso cu tin na Aruba den bienestar pa cada ciudadano di nos pais”, Prome Minister a expresa.