Dr. Jayburtt Dijkhoff, director SIKI:
ORANJESTAD (AAN) – Dr. Jayburtt Dijkhoff, director di SIKI, den entrevista cu DIARIO a splica cu e rapport di STEPS no ta sorprendente, pero ta importante pa indica kico precies e rapport ta bisa di e situacion real di salud di nos pueblo.
Dijkhoff no a bay den profundidad pero si a duna un idea di kico ta e situacion, pasobra e ta un rapport cu ta wordo haci regularmente, door cu salud publico kiermen sa kico ta e condicion di salud di nos pueblo.
“Anto kico ta e condicion di salud di nos pueblo? Basicamente 8 di cada diez Arubiano local, tin sobrepeso y practicamente mitad di nos pueblo tin obesidad. Kiermen, hopi mas sobrepeso cu loke ta un peso normal”, Jayburtt Dijkhoff a señala.
El a agrega cu un di cuater parti di nos poblacion tin presion halto y hobennan di 18 pa 29 aña, un den cada diez di nan, tin presion halto caba.
“Esey kiermen cu den flor di hubentud ya caba ta cuminza cu presion halto. Kico ta bay spera di e grupo aki den futuro”? Y practicamente cuater den Cada diez di nos ciudadanonan ta canando cu un riesgo halto pa haya un of mas malesa cronico”, Dijkhoff a indica, agregando cu esaki sin conta e uso excesivo di alcohol y e uso di tabaco, etc., pa huma, tambe ta subiendo.
Dr. Jayburtt Dijkhoff a señala cu esaki, basicamente, kiermen cu nos rapport como poblacion di Aruba, ta alarmante, pero e no ta sorprendente.
El a menciona e buki berde cu Departamento di Salud Publico a yega di publica na aña 1982, yama “Enfoke riba Salubridad”, anto eynan por wak cu mas of menos 15% di e poblacion tabata tin sobrepeso y mitad tabata tin obesidad caba; pero alomenos 30% di nos comunidad tabata tin un peso mas of menos normal.
“Aworaki, e 30% ey practicamente a disparce. Basicamente, tur hende tin un of otro forma di sobrepeso. Esaki sin conta cu uso di alcohol tambe a subi, cu presion tambe a subi, pasobra nos por wak cu e ta bay te aña 1957 y nos por wak cu e patronchi pa come a bira mas proteina berdad, pero a bira mas vet, mas carbohidrato, e sistema pa haci movecion tambe, no a wordo stimula asina tanto, compara cu e parti di alimentacion; pero alimentacion ta keda e parti mas crucial”, Jayburtt Dijkhoff a duna di conoce.
