Go-Fast cu 693 kilo di cocaina y arma a wordo captura pariba di Curaçao

WILLEMSTAD: Tabata siman pasa den oranan di anochi, cu Guardacosta di Caribe Hulandes a detecta un speedboat tipo Go-Fast moviendo den vecindario di Klein Curaçao y ta bayendo cu tur velocidad direccion panort.

   Esaki a pone cu Rescue Coordination Center di Guardacosta a saca nan speedboat special tipo Metal Shark, y tambe e avion Dash-8 pa bay tira un bista pa asina vigila y intercepta e Go-Fast aki.

   Ora cu Guardacosta a yega den vecindario, esnan abordo di e Go-Fast a ripara y nan a trata di pone mas velocidad pa huy.  Pero e Metal Shark ta move mas rapido y a cuminza yega cerca.  E funcionarionan aki hasta a cuminza los tiro di advertencia pa trata na stop e Go-Fast.

   Pero e tripulacion di Go-Fast a neglisha e advertencianan aki, y a djis sigui pone mas velocidad den nan motornan Outboard potente y sigui bay panort.  Esey a pone cu e personal di Metal Shark a dicidi cu nan ta cuminza tira direct riba e Outboard Engine di e Go-Fast.  Cu e training special di nan, esey a socede rapidamente.  Pues diripiente e Go-Fast a keda sin potencia y a djis keda drief.

   Ora cu e Metal Shark a yega cerca, a bin ripara cu abordo tin 6 homber Venezolano.  Nan a wordo deteni, y e Go-Fast a wordo lastra bek rumbo pa e Pier di Guardacosta.

   Como 693 kilo di cocaina: A bin haya monton di droga scondi den saconan grandi, y tambe arma di candela.  Tur esaki a wordo pasa pa Polis di Curaçao cu a sigui cu e investigacion den e caso aki.  E droga mes mientras tanto a wordo destrui caba.

   Polis a bisa cu e cocaina cu a ser haya tin un peso di 693 kilo.  A haya 4 arma di candela, algun cashi di bala, y tambe un cantidad di municion.

  E seis Venezolanonan deteni ta F.A.V.Q. di 32 aña, J.A.O.Q. di 21 aña, V.A.B.S. di 28 aña, L.J.C.V. di 21 aña, A.J.P.N. di 43 aña, L.E.C.M. di 46 aña.