ORANJESTAD (AAN): Gloria Imax y The Movies como parti di Meta Corp semper ta cla pa aporta y yuda esnan cu limitacion den nos comunidad
y pesey e aña aki un biaha mas riba Dia Internacional di Personanan cu Limitacion, lo tene un evento special.
Devin de Veer, representante di e compania, durante un conferencia di prensa a enfatiza cu e trabao cu esnan ta haci pa yuda personanan cu limitacion no ta facil y pesey e ta aplaudi e persona y instancianan cu semper ta haci nan best pa e hendenan aki, kendenan tambe ta parti hopi importante di nos comunidad.
“Pa nos ta mas cu un honor cu nos por forma parti di e dia aki, caminda cu nos lo habri nos portanan pa duna un bon bini na alrededor di 250 cliente cu nan famia pa bin wak un pelicula”.
Banda di esaki nos ta duna tur cliente registra na un instancia, un popcorn y un bebida”, segun de Veer.
El a sigui bisa cu algun aña pasa caba The Movies a introduci locual ta wordo yama ‘Super Heroes’.
“Nos a introduci Super Heroes pasobra nan ta nos super heroenan, caminda cu tur cliente cu ta oficialmente registra na un instancia pa esnan cu limitacion a haya un carchi cu nan potret riba dje y nan nomber”.
Cu e carchi aki nan por bay wak cualkier pelicula gratis y nan por haya un popcorn y un bebida.
Eingelijk full aña largo nos portanan semper ta habri pa nan y awor nos lo ta parti di e dia special organiza pa nan riba 3 di December, segun De Veer.
El a splica cu e cinema a cumpra ekipo special cu por wordo uza pa personanan cu limitacion di bista, unda cu apesar di no por wak, nan por scucha y experiencia e pelicula na un manera special.
De Veer a splica tambe cu e ta contento pa wak cu comunidad ta bezig na mihor manera pa atende cu y yuda esnan cu limitacion.
“Mi ta contento di bisa tambe cu nos tin un empleado akinan cu ta cliente di FAVI, cu ta traha den cushina cu nos”.
Mas y mas nos ta wak companianan habri nan portanan pa duna personanan cu limitacion un oportunidad, segun De Veer kende a bisa cu e ta orguyoso di Lisa di FAVI, kende ta un empleado ehemplar cu semper ta na ora y ta haci su trabao cu mil amor, apesar di e hecho cu e tin un limitacion.
