DOW cu proyecto di parking pa taxi den dos punto di Wilhelminastraat

Den cuadro di stimula F&B den area di Caya

ORANJESTAD (AAN) – Ing. Marlon Croes, director di Departamento di Obranan Publico (DOW), den  entrevista cu DIARIO a confirma cu DOW mester a kita dos lugar di taxi, cu pronto lo wordo ubica mas cerca di  restaurant na Wilhelminastraat, pa haci’e mas accesible pa e turistanan.

Esaki den cuadro di un proyecto cu a finaliza y mester a wordo entrega na e forma cu e ta, y den e dianan binidero DOW lo pone e borchinan den Wilhelminastraat mes, un tiki mas Pariba. E ta bay bira e dos vaknan cu tin na man drechi y lo wordo apunta como “taxi stand plats” pa busca y hiba hende si mester.

Den e proyecto nobo cu DOW tin, un destaho publico a tuma lugar Diabierna cu a pasa, pa den e parking den e planchi di Rietveld Academy tambe a tene cuenta cu 4 of 5 parkeer vak pa taxi, kiermen e taxistanan ta bay tin dos punto pa baha y tuma turistanan. Esaki ta pa stimula e negoshi di F&B den Caya.

Pa hopi aña no tabata tin esaki, despues cu den pasado tabata tin un parking dedica pa taxi, pero a bin ripara cu no ta taxi tabata us’e sino e doñonan di establecimento. Aworaki a cambia e maneho y nan ta wordo poni den lugarnan estrategico riba caya pa por stimula e actividadnan di f&b den Caya, director di DOW a remarca.

Croes a agrega cu den Palm Beach High Rise Corridor, tambe ta bezig cu e proyecto di lugar pa taxi, y nan ta den fase 1 di destaho publico, caminda ta bay traha e riolering bao tera y e di dos parti, cu ta embeyecimento, lo tene cuenta cu esaki tambe.

E control pa e taxi vaks den ciudad no wordo uza pa esnan cu no ta taxista, ta cay bao KPA y Aruparking, segun director di DOW.