ORANJESTAD (AAN): Riba 3 di December ta bay celebra Dia Internacional di Personanan cu Limitacion y durante un conferencia Angelique Perez Kelly,
coordinador na Sonrisa y miembro di Plataforma pa personanan cu limitacion, a splica cu e celebracion riba e dia ta pa concientiza comunidad pa tene cuenta cu e hecho cu manera tur pais Aruba tambe tin varios persona cu limitacion fisico y mental y cu nan tambe tin diferente derecho.
“Nos ta bay celebra e dia na Gloria Imax, caminda cu ta bay tin un evento unda cu e clientenan di tur instancia pa esnan cu limitacion lo bay wak un pelicula gratis y lo disfruta tambe di cosnan di bebe y come gratis”, segun Perez Kelly.
El a splica cu ta bay tin face painting pa muchanan tambe, mientras cu Sinterklaas lo cana rond pa entretene e muchanan.
“Nos ta hopi contento y agradecido cu e hecho cu semper Gloria ta trata nos clientenan cu mil amor”, segun Perez Kelly kende a sigui bisa cu kico ta mas bunita cu laga e clientenan bay Gloria y sinti nan mes special.
El a bisa tambe cu semper Plataforma ta traha na beneficio di e derechonan di personanan cu limitacion.
Segun Kelly, lamentablemente door di accidentenan e cantidad di persona cu limitacion fisico a aumenta bastante na Aruba den ultimo añanan.
