Lider di Sindicato TOPA:
*Pa draai e dienst no tin suficiente Bewaarder ni Beveiliging
ORANJESTAD (AAN)-- Lider di Sindicato TOPA, señor Edsel Figaroa, den entrevista cu Matutino DIARIO, a splica cu el a wordo acerca diferente biaha, y no di awo, pero pa añanan caba, door di e trahadornan di KIA, tocante e situacion cu tin eynan, cu no tin suficiente personal pa draai e dienst.
“Por ehemplo, actualmente, kiermen aworaki, pa nan draai e warda di 7’or di mainta pa 3’or di atardi, mester di alomenos 10 persona extra cu mester busca pa traha overtime, si no e dienst no por draai normal”, Figaroa a señala.
El a agrega cu mescos ta sosode pa e warda di 3’or pa 11’or unda mester di cinco pa seis persona pa traha overtime. E siguiente warda cu ta di 11’ or pa 7’or atrobe mes cinco pa seis persona pa traha overtime.
Kiermen, cu pa e Instituto draai bon, mester di alomenos 22 persona extra pa dia, pa traha overtime. “E trahadornan aki no ta haya chens di descansa. Nan ta bin traha, tin di nan cu ta traha 16 ora, bay cas sosega, bolbe bin traha. E consecuencia di esey ta cu e trahado ta bira irita, e ta haya mal beis, e ta bira malo pasobra su energia ta baha, y nan ta meld AO. Consecuencia di esey ta bin tende cu nan ta mal trahado, cu no ta coopera pasobra ta bira malo. Pero e stress di trabao ta duna bo e situacion eynan”, Edsel Figaroa, presidente di TOPA, a señala.
El a sigui bisa cu p’e bay mas leu riba dje, na cierto momento no tin espacio pa e trahado tuma vakantie.
“Bo no por tuma vakantie, bo no por descansa, esnan cu ta deteni tambe ta mire riba e trahado cu ta irita lihe, e ta fada, bo ta purba simile tur dia, pero bo ta trahando den un situacion asina pa hopi ora, cansa, e smile no ta sali riba bo cara, ni cu bo oblig’e”, Figaroa a subraya.
Señor Figaroa a señala cu actualmente tin 31 bewaarder ta trahando den Beveiliging, y pa traha optimalmente mester di alomenos 115 bewaarder y 68 beveiliging. “Kiermen, manera oir ta mira tin un short basta grandi”, Lider di sindicato TOPA a señala.
