Gran honor pa Sr. Fuentes
ORANJESTAD (AAN): Informacion cu DIARIO a ricibi, ta indica cu Sr. Luis Fuentes, kende ta e actual gerente general di RIU Palace Antillas Hotel, a wordo promovi door di e exitoso compania hotelero europeo RIU, pa bay maneha awor RIU Palace Bavaro na Punta Cana, Republica Dominicana.
Despues di casi 3 aña y mey dirigiendo RIU Palace Antillas na Palm Beach na Aruba, awor Sr. Fuentes ta asumi e reto di upgrade, pa bay dirigi un super hotel di 1.000 camber, esta RIU Palace Bavaro. E lo bay pone den practica su gran experiencia na Spaña y tambe na Panama, unda el a yega di maneha positivamente e RIU Palace Playa Blanca, prome cu el a wordo escogi pa bin Aruba.
Fuentes a indica cu e ta hopi agradeci pa Aruba y su hendenan, pa tur loke el a siña aki, cu a yude sigur pa mehora su experiencia hotelero, y tin hopi admiracion pa e capacidad grandi di Arubianonan pa atende turismo global.
E noticia aki cu e ta sigui subi e trapi di exito, a wordo bon ricibi pa su coleganan na Aruba. Un upgrade pa maneha mucho mas camber, ta algo cu sigur Sr. Fuentes lo no tin problema cune.
DIARIO ta desea Sr. Luis Fuentes, tur clase di exito den su funcion nobo, cu lo bay ta tambe hopi positivo.
A compronde cu Sr. Fuentes lo bay keda na Aruba te cu fin di Juni 2024. Danki na dje pa e bon atencion brinda na e bishitantenan door di dje, y di e empleadonan atento di RIU Palace Antillas Hotel. Hopi exito di awor caba, di parti di tur hende.
