Fundacion Parke Nacional Aruba evaluando daño ocasiona na Conchi

ORANJESTAD (AAN):  Despues di e emergencia cu a presenta su mes ora cu un Speedboat tipo Go-Fast a dal contra e barancanan na Conchi,

Fundacion Parke Nacional Aruba a anuncia cu Conchi (Natural Pool) ta bay cera pa publico te proximo aviso.

   Manera DIARIO a trece dilanti caba den edicion di Diahuebs, tabata Diaranson atardi cu un Go-Fast yena cu combustible y droga a spula y kibra na werki riba e barancanan banda di Cura di Tortuga, conoci como Conchi.

Akinan dos bari cu gasolin, tambe varios bulto cu droga y e restonan di e boto a keda contamina grandemente e area di Conchi.  E hecho cu gasolin mes a plama den lama, y tabata produci holor fuerte den e area, ta indica cu e contaminacion aki ta serio!  Si un landador bay landa den lama cu ta contamina cu gasolin of otro tipo di combustible, e ta bay haya grawatamento instantaneo como tambe rash incomfortable ta aparece riba su curpa.

Fundacion Parke Nacional Aruba a cera e area, pa asina evalua e dañonan ocasiona na e naturalesa y tambe ta haciendo e area aki limpi.  Por mira cu a haya algun pisca y tambe kreeft morto eybanda.

Ademas di droga y gasolin, e boto aki tabata transportando tambe un tas, den cual autoridad a haya dos Iridium Satellite Phone, y tambe un GPS Map Locator.

FPNA ta remarca cu lo mester di algun dia prome cu e zona por bira sigur bek pa wordo bishita, y esey kizas lo ta pronto. E recuperacion mes di e area aki cu ta protegi lo tarda luna- y kizas añanan.

Potretnan pa cortesia pagina Facebook di FPNA.