Fundacion Miju ta organisa un 'Back 2 School Fundraising Bike Ride' dia 3 di augustus 2024

ORANJESTAD (AAN): Fundacion MiJu, bou iniciativa di dos docente Milly Koolman y Judesca Holsman, a lanta oficialmente na januari 2019

cu e meta pa yuda tur mucha y hoben bayendo scol den tur manera cu lo ta necesario pa nan lo por tin un aña escolar yena di goso y energia sin ningun preocupacion.

            Manera custumber durante aña e fundacion ta enfoca riba 2 actividad grandi pa recauda fondo; 1. Adopt a Child for Back 2 School y 2. Christmas of Hope.

            E fundacion ta traha cu liña estrecho cu e directiva y team di cuido di e scolnan. Via e canal aki ta ricibi tur aña un lista di nomber di e mucha-/ hobennan cu ta bin na remarca pa ayudo social-economico-financiero.

            Pa e campaña di Adopt a Child for Back 2 School e fundacion ta cubri e schoolgeld di cada mucha/ hoben, ta duna nan 2 uniform y un tas cu tur articulo necesario pa nan por cuminsa e aña escolar nobo.

            Pa e campaña di Christmas of Hope ta regala cada famia un basket yena cu comestibel y boca dushi pa asina nan por celebra un Pasco y Aña Nobo feliz y contento.

            Tur esaki sin mas no por ta posibel sin e fondonan necesario. P’esey kier participa cu e fundacion ta organisando un “Back 2 School 5^th Anniversary Fundraising Bike Ride” dia 3 di augustus 2024.

            Dia 31 di juli 2024 lo tin e anochi di inscripcion pa e Back 2 School 5^th Anniversary Fundraising Bike Ride cu lo tuma luga aki mes na Alameda Café den John G. Emanstraat. Esaki lo ta di 6pm pa 10pm y lo tin un costo pa persona, cual lo bay completo pa e ayudo di nos muchanan.

            Dia 3 di augustus 2024 lo tin e Ride oficial cu lo sali pa 6pm for di Alameda Café y lo termina na Alameda Café cu un grandioso fiesta hunto cu Zeta Band y tambe manera custumber lo bay tin varios premio fabuloso pa rifa bou di nos publico y e bikernan.

            Si acaso bo persona no ta desea di participa den e ride pero si ta desea di haci un donacion den efectivo esaki ta posibel for di awe caba ya cu tin un box disponibel aki mes na Alameda Café den cua bo persona lo por haci bo donacion. Tambe tin box na MIPA na Bloemond y na Pos chikito Rumshop.

            Kier enfatisa cu tur tipo di bike ta bonbini den nos ride. Ademas nos kier invita tur hende cu kier bin pasa un diasabra agradabel yena di goso y alegria hunto pa yega y forma parti di e gran celebracion. Pa esnan cu yega y kier haci un donacion, lo tin un box disponibel. Tur contribucion ta bonbini pa asina nos por cumpli cu nos meta.

            E meta principal pa e dia aki lo ta pa haya e fondonan necesario pa por yuda lo mas hopi mucha/ hoben e aña aki pa bay scol bek feliz y contento, sin niun preocupacion.