Mundo liber cobarde a haci Pueblo Venezolano victima di San Nicolas
*Awe mundo ciego ta realiza cu un payaso ta ridiculisa ley na Miraflores?
*DIARIO a splica con mundo a lubida Guaido y brasa San Azeta Nicolas
ORANJESTAD (AAN) — Ayera mundo a contesta e resultado di eleccionnan na Venezuela.
Nos respet pa democracia ta haci cu nos no por papia realmente di un eleccion pero mas bien di un circo di mal gusto cu solamente un homber manera Nicolas Maduro por produci.
Den e sucesonan no solamente di e ultimo eleccion aki pero for di 2018, loke mas ta causa nos asombro, ta e hecho cu mundo ta parce asombra cu resultado di loke ta yama eleccion na Venezuela y e actitud di Nicolas Maduro.
Ban ta serio, mundo! For di 2018 a dicidi cu no ta acepta Nicolas Maduro como Presidente di Venezuela.
Un parti grandi di mundo a bisa cu nan ta cu Juan Guaido, cu DIARIO e tempo a cualifica loke na Hulandes nos ta yama “Jan zonder Land”, cu finalmente tambe a kea sin land y sin titulo.
E mes mundo cu ta grita awe, cu Nicolas Maduro a ripiti su wega sushi, ta e mundo cu a atende y sigui atende cu Nicolas Maduro como Presidente na Venezuela persobra el a mustra cu e ta keda sinta den Miraflores y cu ningun hende por mande cas, si e tabata tin cas prome cu el a bira Presidente.
E mundo cu a cuminsa hasta discuti con e mester percura pa placa riba cuentanan bancario di Venezuela no cay den man di Nicolas Maduro ya propiedad di Venezuela wordo bon sigura contra Nicolas, tabata bishita Nicolas na Miraflores pa e simpel motibo cu Nicolas a nenga di baha como Presidente y a duna mundo e prueba kico ta pasa si bo bira enemigo di “San Nicolas” di petroleo.
Nos ta papia loke ta berdad. Cu ki cara Biden ta bay atende cu Nicolas Maduro, cu a nenga di entrega bastuta na Juan Guaido y a keda sinta riba e stul di Miraflores, caminda segun mundo liber, Juan Guaido mester a sinta?
Di kico awe mundo liber ta papia si mundo liber mes a dicidi cu Nicolas Maduro por keda sinta riba e stul presidencial, asisti na reunionnan di Nacionnan Uni, habri su boca ora e kier como Presidente di Venezuela?
Pakico for di 2018, mundo no a para firma contra Nicolas Maduro?
E Pueblo Venezolano a bira victima di Nicolas Maduro for di 2018, ora Nicolas Maduro a trapa riba sistema democratico na eleccion, cu mundo a rechaza.
Ora mundo mester a escoge entre dos Presidente, Nicolas Maduro cu ta un dictador y Juan Guaido cu mundo mes a sostene Presidente segun leynan di e pais, Nicolas Maduro a trapa riba opinion di mundo liber y hunto cu su aliadonan comunista y peligroso pa mundo liber, a mustra cu e no ta bandona Miraflores.
Kico mundo a haci? Nicolas Maduro sinta den Nacionnan Uni. Nicolas Maduro doño di Miraflores y di poder di Venezuela, creando situacionnan sumamente peligroso den e region.
Pero mundo a cera wowo y Nicolas Maduro a bira aceptabel pa un mundo liber cu tur dia ta perde mas libertad pasobra e tin miedo pa actua pa diferente motibo.
For di siman pasa, DIARIO a splica kico lo pasa na Venezuela.
El a pasa. Nicolas Maduro a gana eleccion, aunke ningun hende por bisa kico a pasa na e eleccion.
Nicolas Maduro a ripiti e wega di 2018 y ta keda Rey di Venezuela y di e grupo mundial peligroso pa henter mundo.
Awor despues di tanto amargura di Venezolano, paden y pafor di Venezuela, paden y pafor di prisonnan cruel na Venezuela, mundo ta bay actua? Pakico mundo no a actua prome?
Mundo liber no conoce hamber di e Venezolano cu ta nenga di bende su mes cu Nicolas Maduro cu tambe a nace cu hamber na su boca, pero a uza poder na Venezuela pa bira poderoso?
Awe DIARIO simplemente ta papia loke nos a bini ta papia tur tempo. Mundo liber mester bira menos hipocrita pa asina enfrenta dolor real di hende, victima di usurpadornan.
DIARIO ta contempla e reaccionnan di mundo contra e forma di “hands up”cu cual Nicolas Maduro ta keda Presidente sinta den Miraflores, cu el a nenga di bandona na 2018.
Rapportnan di Nacionnan Uni riba Derecho Humano, ta splica e dolor di inocentenan den prison. Victimanan mortal di abuso. Un Pueblo desgracia y un region den tension total pa e papel importante di Nicolas Maduro den e menaza mundial di Putin, cu a yena Venezuela cu ekipo militar pa por sigui cu e conkista Comunista sangriente, cu Ukraine sigur ta representa.
Awe mundo liber kier protesta. Pero no ta mundo liber mes a faya y a nenga di confronta Nicolas Maduro como usurpador peligroso di poder, cu ta dune e poder pa mata y sigui mata; destrui y sigui destrui????
