Fundacion Epilepsia Aruba a celebra 19 aña di existencia

Diasabra awor tin encuentro pa comunidad

ORANJESTAD (AAN): Recientemente Fundacion Epilepsia Aruba a celebra su 19 aña di existencia, marcando casi dos decada di compromiso cu informacion, conscientisacion y apoyo pa personanan cu epilepsia y nan famia.

   Como parti di e compromiso aki, riba 16 di mei 2026, e fundacion a organisa su prome encuentro “Mama Nan Ban Topa” na WGK Savaneta. E mainta special aki a reuni diferente mamanan cu tin un yiu cu epilepsia den un ambiente calmo, sigur y yen di comprondemento.

   Durante e encuentro, mamanan a haya oportunidad pa siña mas tocante epilepsia, comparti nan experiencia personal y conecta cu otro mayornan cu ta pasa pa situacionnan similar. E mainta tabata yen di informacion util, apoyo emocional y momentonan di conexion cu a toca hopi curason.

   Fundacion Epilepsia Aruba ta hopi contento di mira cu tin mamanan cu ta ansioso pa siña mas, pero tambe cu tin necesidad di comparti nan historia y tende cu nan no ta nan so den e caminda aki. E encuentro a confirma cu tin un gran necesidad den nos comunidad pa crea espacionan unda personanan por sinti nan mes comprendi, sosteni y informa.

   Encuentro Social: Siguiendo e iniciativa aki, Fundacion Epilepsia Aruba ta invita comunidad pa un encuentro social riba 6 di juni 2026 na Club San Martin, di 9:00 am te 11:00 am. E tema central lo ta enfoca riba con pa maneha emocionnan ora bo ta biba cu epilepsia, of ora bo tin un ser keri cu epilepsia.

   E encuentro aki ta habri pa tur hende cu tin epilepsia, tin un familiar cu epilepsia of simplemente kier siña mas y compronde miho.

  E meta ta pa sigui concientisa, ofrece apoyo emocional y fortalece e sentimento cu ningun hende no mester pasa pa e experiencia aki nan so.

   Fundacion Epilepsia Aruba kier gradici tur mama cu a participa, tur persona cu ta yuda organisa e maintanan, y tur sponsor nan cu ta contribui pa haci e encuentronan un exito.

  Cu hopi entusiasmo, e fundacion ta mira dilanti pa futuro encuentronan y pa sigui creando mas conexion y apoyo den nos comunidad.

   Pa mas informacion, comunidad por sigui Fundacion Epilepsia Aruba riba red social, of tuma contacto cu Margarita na 593-5806 of Maryla na 594-5362.  “Bo no ta bo so.”