Charlene Leslie, Coordinador di Proyecto: --ORANJESTAD (AAN) – Den e conferencia di prensa yama pa Fundacion pa Nos Grandinan Club Kibrahacha,
e Coordinador di Proyecto di Fundacion Diabetes Aruba a trece dilanti cu e kier a djis duna un idea di kico asina e charlanan riba tema di salud, lo ofrece e dianan aki, na unda cu na un manera hopi inter-activo, lo duna informacion y educacion riba e parti di maneho propio y prevencion, pa asina esnan cu tin diabetes, of esnan cu kier preveni esaki tin un idea con nan por influencia nan salud, na un forma positivo.
“Banda di esey tambe, nos lo pone atencion riba e cuido di pianan cual ta un factor grandi na momento cu e persona tin diabetes”, Charlene Leslie a duna di conoce.
El a agrega cu e charlanan aki no ta solamente pa nos grandinan pero tambe pa cada adulto cu kier sa mas con pa tuma control di nan salud.
“Nos di Fundacion Diabetes ta bastante preocupa, door di e cifranan cu nos tin caba di añanan anterior, pero tambe e influencia cu nos ta wak cu e pandemia tin riba e salud di nos comunidad, unda cu enberdad nos ta bay pa hopi opcion facil, cu no semper ta esun di mas saludable. Pero tambe nos ta wak e influencia pa nos grandinan, cu algun persona a keda cu miedo, cu no ta durf di sali for di cas, of cu a pone nan salud na di dos lugar y den e pandemia aki ta mas duidelijk con importante nos salud ta na e momentonan aki”, Charlene Leslie a señala.
