ORANJESTAD (AAN) – Recientemente un delegacion di Aruba lidera pa Minister demisionario di Turismo, Danguillaume Oduber
hunto cu CEO di Aruba Tourism Authority (A.T.A.) Ronella Croes, Cruise Manager Mario Arends y di parti di Aruba Ports Authority (APA) Director Marc Figaroa, a biaha bay Miami pa participa den diferente reunion clave pa nos destinacion pa loke ta trata turismo crusero.
Entre otro a reuni cu ehecutivonan di Royal Caribbean Cruise Lines (RCCL) cual ta un di e lineanan di crusero cu ta produci mas hopi turista crusero pa nos destinacion. Esaki sigur ta di importancia pa Aruba su industria di turismo.
E contacto entre e lineanan crusero y e destinacionnan cu nan ta scoge pa bishita ta importante, pa delinea den cua direccion mester desaroya. Pa Aruba e preparacion y inversionnan ta necesario pa asina fortifica e bentaha competitivo cu nos isla ta goza di dje. Un bon preparacion ta percura cu nos isla por ricibi barconan di crusero cu mas turista cual na su turno ta bentahoso pa nos economia.
Durante e reunionnan, ehecutivonan di e lineanan crusero a mustra di tin hopi confiansa den Aruba. Tin interes di nan parti pa inverti den e facilidadnan di nos waf pero tambe den e proyecto di Port City Oranjestad cual tin como meta pa renoba e waf actual. Aruba Ports Authority a duna un update riba e inversionnan y a indica debi cu na e COVID-19 a posponi algun proyecto, pero lo continua cu esakinan pronto.
E pandemia mundial a percura cu awo cruseronan ta nabega cu un itinerario ahusta. Cada crusero ta adapta na e protocol di Covid-19 segun e ta wordo implementa. Pa tal motibo, e retonan den otro areanan den Caribe por trece barconan crusero adicional pa Aruba di loke ta trata e resto pa aña 2021.
Sinembargo pa añanan 2022 y 2023 a wordo papia cu Aruba por spera di ricibi barconan manera e Quantum Class y e Oasis Class di RCCL cual ta e barconan mas nobo di e linea crusero aki pero desde 2019 tambe ta wordo considera como e barconan crusero mas grandi di mundo.
Turismo crusero a bira mundialmente un parti esencial den e industria di turismo cu globalmente ta produci un average di US$ 29.4 biyon pa aña y mas cu 19 biyon pasahero.
Resultado di BREA (un compania internacional cu ta midi cuanto turistanan crusero ta laga atras den economia) ta mustra den nan raport di 2018 cu e turistanan ta laga un promedio di US$ 121.94.- pa persona pa cada destinacion atras.
Pa Aruba na aña 2019 un total di 823.001 turistanan crusero a bishita e isla riba un total di 324 diferente barco crusero.
Ta bon pa menciona cu pa 2021, lineanan di crusero manera RCCL (Royal Caribbean Cruise Lines) y CCL (Carnival Cruise Lines) ta registrando gradonan di satisfaccion mas halto bao nan pasaheronan compara cu prome cu e pandemia. Alaves e cantidad di placa cu e pasaheronan crusero ta gastando den e destinacionnan tambe a subi.
Ministerio di Turismo, A.T.A. y APA lo continua hunto pa haci esfuersonan pa recuperacion di nos turismo crusero.
Ta sumamente importante pa nos tur sigui e protocolnan manera stipula door di diferente instancia. Pasobra ta hunto lo vence pa nos isla y su turismo por sigui florece.
