El a maneha desaster den tempo cu ainda tecnologia no tabata tin contesta ---*E crisis di hende ta e problema mas grandi den evolucion di ayera pa futuro
ORANJESTAD (AAN) — Condicionnan di clima y tempo, tabata uno di e topiconan importante cu DIARIO na su nacemento na final di decada 80 di Siglo 20, mester a presenta na e Pueblo di Aruba.
Noticia di tempo na un paraiso tropical manera Aruba, tabata un asunto cu tabata causa hasta risa te na momento, cu naturalesa tabata expresa su mes y hende no tabata tin tur e recursonan di awe pa atende cu condicionnan di tempo.
Den e tempo, tres bes pa dia, pa medio di un proceso special, e departamento di Servicio Meteorologico di Antia tabata ricibi tres portret di satelite pa dia.
E portretnan no tabata di color, pero blanco y preto y hopi bez tabata tuma nan tempo pa yega pa por a wordo interpreta dor di personal Servicio Meteorologico di Antia cu un oficina na Aruba, cu no tabata permiti pa duna informacion na prensa.
Na decada 80, hende ainda no tabata papia di e posibilidad cu nivel di lama lo a subi ni cu hende lo ta pendiente con e ta bay atence cu naturalesa cu ta menasa cu calor extremo, horcannan mas pisa, inundacionnan cu por spera y cambionan pisa den mundo cu por spera for di final di Siglo 21.
Na 2021, cambionan grandi a presenta y noticia di condicionnan di clima, ta bira no solamente e noticia mas importante pa hende sa cu si e por tene barbeque , pero pa hende mira con e ta bay confronta naturalesa.
Den un situacion nobo, DIARIO ta bolbe na uno di su tareanan basico cu e tabata tin pa informa Aruba di tempo prome cu computer, tabata permiti hende cada rato mira directamente kico condicionnan ta rond mundo.
Na inicio di e temporada di horcan 2021, DIARIO ta papia cu Bibi Arends, cu pa su interes pa naturalesa a bira tambe e persona cu a wordo encarga cu Maneho di Calamidad, Maneho di Desaster na Aruba.
Mientras manera DIARIO a informa for di algun dia pasa, actualmente den region di Caribe un sistema tropical ta bira tormenta tropical, DIARIO ta prepara presentacion di varios articulo a base di combersacion cu Bibi Arends, cu durante e prome combersacion no ta cuminsa papia directamente di e sistema tropical cu ta menasa region di Caribe, pero di otro menasa cu DIARIO tambe continuamente a ilustra.
Bibi Arends ta papia di e cambionan grandi cu for di decada ochenta a presenta na mundo cu a mira un union di lidernan mundial y esfuersonan conhunto cu a trece e revolucion di ciencia y tecnologia cu a domina hende.
Bibi Arends, un persona cu ta conoci pa tur actividad cu el a desplega na Aruba y ta conoci den service clubs, den e tempo di Tivoli y Carnaval, pa por drenta e ambiente di clima y loke a cambia na mundo, ta papia di e crisis grandi di hende, cu a cambia mundo cu awe mester enfrenta problema serio pero aparentemente no tin interes pa e temanan mas importante cu ta afecta hende.
E punto aki ta hustamente e punto cu ta crea e problemanan mas importante na mundo.
Pa DIARIO, e prome topico cu Bibi Arends a aborda, ta e topico mas frecuente di e generacion cu a mira e cambio di hende, di comunidad, desaroya y asina crea un mentalidad den cual e ser humano ta perde e bataya contra tecnologia y ciencia, cu ta avansa pero no ta aporta na e crecemento real di e ser humano.
Mundo ta enfrenta momentonan di un peliger enorme provoca pa abuso di naturalesa. Manera DIARIO a mustra, cambionan di clima, mester haya atencion. Aruba awe mas cu nunca mester tene condicion climatologico na bista pa loke e por haci cu comunidad.
Pero hunto cu Bibi Arends e prome topico cu a wordo discuti ta e hende, cu tin den su man e hermentnan necesario pa evita dolor y tragedia pa su mes.
Esaki ta haci cu prome cu DIARIO a papia cu Bibi Arends di loke clima y temporada di horcan lo por causa pa hende, nos a papia di e hende mes cu mester mira con e ta permiti un pandemia, permiti crisis mundial, permiti tur tipo di peliger y sigur e peliger di un mentalidad sin responsabilidad, pone bida y bienestar real di hende na peliger.
