Fundacion Contra Violencia Relacional ta gradici tur voluntario cu a participa den nan proyecto cu Aruba Doet

ORANJESTAD (AAN):  Fundacion Contra Violencia Relacional kier a gradici un y tur cu a contribui cu e proyecto di nan di Aruba Doet. 

Un ekipo di voluntarionan cu a consisti di un iglesia, famia di e empleadonan y cu un sosten di comerciantenan a pone man hunto pa yuda nos fundacion, cu ta yuda victima y sobreviviente di violencia relacional.

Sra. Magaly Maduro, coordinadora di FCVR ta sumamente satisfecho cu e bunita gesto aki pa cu nan fundacion. “E ta increibel con nan a bin traha cu cuerpo y alma pa duna nos edificio un look nobo. No unicamente a verf paden di e edificio, e oficinanan sino tambe a haci trabaonan den e hardin y a duna nos un aliento nobo pa e bunitesa di e matanan cu nos tin.”

Manera ta conoci dianan 28 y 29 di mei 2021, Cede Aruba den cooperación cu OranjeFonds a organisa e di 8 edicion di Aruba DOET, e evento mas grandi di voluntarismo riba e isla.

Hulanda hunto cu e 5 islanan den Caribe Hulandes ta enfoca riba e iniciativa di voluntarionan y ta stimula tur hende cu por pa duna nan tempo pa yuda esnan cu mester.

 Fundacion Contra Violencia Relacional ta un fundacion cu ta existi pa mas cu 25 aña caba y a sa di asisti e victima y sobreviviente di violencia relacional, yuda nan pa nan por haya nan mes bek y guianan pa biba un bida mihor cu amor propio y cu respet y dignidad.