ORANJESTAD (AAN): Den weekend cu a pasa, CEDE Aruba conhuntamente cu Oranje Fonds, a tene e dos dianan di Aruba Doet, e accion bolunario mas grandi di Aruba.
E team di Aruba Doet ta sumamente contento cu, despues di postpone e evento di maart pa mei, awor si Aruba Ta “Doet”. CEDE Aruba y Aruba Doet kier enfatisa cu trabao boluntario ta importante pa comunidad. E ta trece un satisfaccion pa e boluntario nan, mirando cu nan lo sinti nan aporta na algo cu lo yuda na nos organizacionann. Door di eherce trabao boluntario nos ta planta e valor nan aki den esun nan mas chikito den nos comunidad. Nan lo mira e ehempel di nan mayornan y nan tambe lo haya e gana pa haci algo bon pa nan sinti bon. Ta pesey mes e lema di Aruba Doet ta: “Haci bon, pasa bon”.
Finalmente, Aruba Doet ta crea un conecion entre e boluntario y e organizacion. E idea ta pa e trabao boluntario bira algo continuo, na unda e sosten di boluntarionan ta continua despues di e accion.
E aña aki tabatin 167 proyecto registra y un total di 2.700 voluntario registra. Un dia prome cu e evento, ainda tabata falta 200 boluntario pa registra, pero hopi biaha mas hende ta yega sin registra. 75% di e proyectonan ta trabao di mantencion, manera verf, drecha y limpiesa. 20% ta cai den e categoria di agricultura, manera traha un greenhouse y planta mata. Como 5% ta actividad social, cual ta mucho menos cu aña nan anterior en connecion cu Covid-19.
E proyectonan ta hopi diverso y akinan ta menciona algun ehempel. Un proyecto social di e studiante nan di Universidad, cual ta ensera un tayer pa hende grandi di Savaneta con pa atende y maneha cu electronica, uso di telefon cellular etc. Varios proyecto ta ensera construccion di diferente ‘greenhouses’ y planta mata, entre otro proyectonan di Scol practico pa ofishi St. Cruz, Stichting Ban lanta y planta, ADRA Aruba, Movimiento te bida - Hunto grandi, grandi hunto, Brenchi's Cunucu, Filomena College MAVO y Stichting Ambiente Nobo. E organizacion di ‘Reach your Goal’ tin un programa pa cuida e cuebanan hunto cu hobennan. Tambe tin un proyecto pa stimula recreaccion cu kayak pa esnan visualmente incapacita y pa crea un zipline pa hende cu limitacion.
CEDE Aruba y Aruba Doet kier tuma un momento pa gradici tur e compania nan y participante cu a duna aporte na Aruba Doet.
