ORANJESTAD (AAN): Fundacion Autismo Aruba (FAA) ta anuncia cu nan lo ta participa
na un forum internacional titula ‘Call to Action’ na e Oficina Principal di Nacionnan Uni na New York City 4 di april benidero.
Como parti di nan meta pa crea conscientisacion y trece cambio sistematico na bienestar di persona riba e spectrum di autismo, nan ta asisti na e forum aki. Nan delegacion lo consisti di Byron Lesire y Kay Quandus cu lo hiba palabra como ‘Self-Advocates’, Stephany van der Biezen-Croes cu lo hiba palabra como ‘Parent Advocate’, Carolina Thiel-Span (presidente FAA) cu lo ta encarga cu e organisacion y Raquel Lesire como sosten.
Topiconan cu lo bin dilanti durante e forum aki ta basa riba e ‘Global Report on developmental Disabilities’ di WHO y UNICEF. FAA lo enfoca riba algun mensahe clave manera:
- Barera di inclusion y participacion den area social, economico y educacional
- Inigualdad den salud incluyendo salud mental
- Cambio efectivo den maneho y legislacion cu ta promove inclusion y proteccion
- Barera den cuido medico specialisa y na tempo pa muchanan bou di cinco aña
Fundacion Autismo Aruba a lanta na 2005 cu e meta pa sostene personanan cu Autismo y nan famia, pa medio di campaña di consientisacion, tayer pa mayor y docente, y actividad particularmente pa personanan autista.
E fundacion ta totalmente dependiente di donacion y ta constantemente en busca di miembronan pa fungi den directiva y como boluntario.
Na banda di e forum tambe FAA lo participa na un Exhibicion di Arte den Nacionnan Uni di 4 pa 9 di April 2024 cu diferente piesa (cuadra y poesia) di Kay Quandus. Luna di april ta reconoci internacionalmente como e luna mundial di conscientisacion di autismo, pues nan ta contento di por participa e aña aki den forma grandi.
Durante e luna di April lo tin algun tayer pa mayor, hoben y educador riba diferente topico manera ‘Dating on the Spectrum’, ‘Self-Advocacy’ y e rol di educador den scol secundario.
Fundacion Autismo Aruba por participa na e evento aki y sigui brinda tayernan danki na e contribucion di tur persona y compania cu ta haci donacion na nan fundacion.
