Fundacion Alzheimer tabata tin su di dos seminario tocante Alzheimer y Abuso Adulto Mayor

Melva Croes-Yanes a splica:

ORANJESTAD (AAN) – Den fin di siman cu a pasa, a tuma lugar e seminario #2, organiza pa Fundacion Alzheimer Aruba, bao presidencia di e Neuro-psicologo Melva Croes-Yanes.

Manera ta conoci, siman pasa a tuma lugar e seminario #1, riba e tema Abuso di Adulto Mayor y den e di dos seminario tabata presente un notario. Aki Melva Croes-Yanes mes, a hiba palabra y tambe Alida Marval cu a sigui cu e tema cu el a cuminza siman pasa, basa riba su investigacion.

Croes-Yanes a comenta cu e mester a cambia su tema, pa motibo cu el a haya un relato di Nacionnan Uni y riba esey el a papia tocante abuso di adulto mayor, y di e aspecto di emergencia y crisis.

Esaki a sali den un rapport di Nacionnan Uni, unda e biaha aki a papia un poco mas riba e tema.

Segun e rapport di ONU, Melva a comenta, tin paisnan cu no ta pone atencion na e adultonan mayor, durante emergencia/crisis, of desastre.

El a pone como ehemplo loke a pasa cu horcan Katrina (2005), ora cu awa a drenta den un cas di cuido y tur trahado a core abandona e lugar y laga e grandinan ta drief riba awa. Mas cu 50% di nan a fayece.

Eseynan ta cosnan cu ta sosodiendo durante di crisis, Melva Croes-Yanes a subraya. Y tambe tin hendenan cu ta probecha momentonan asina pa atraca hende grandi.

El comenta cu den calamidadnan asina tambe ta sosode vandalismo di hendenan sin escrupulo cu ta probecha di esey y mas si tin hende cu tin un tiki cen.

El a splica cu e grandinan vooral riba 70, maske no ta tur, tin hopi di nan ta saludable. “Pero, nos ta papiando di esnan cu ta riba rolstoel, esnan cu no por cana bon, y cu tin otro problemanan”, Croes-Yanes a indica.

E dama a subraya cu e Fundacion por remedia esaki, maske sea pone nan granito di arena, pa wak con por drecha e situacion.

Melva Croes-Yanes a expresa cu ya dia 1 di Juni a cuminza e temporada di horcan, y e fundacion ta puntrando su mes si tin algo “in place, of ta awor ta bay traha den pura”.

El menciona cu bon por ta cu tin algo “in place caba”, pero e fundacion y kizas pueblo kier sa con bon e pais ta prepara pa cu adultonan mayor, con ta tene na cuenta cu nan.

“Bo ta mira cu tin hopi ley eifo, leynan di exclusividad, di tur clase di grupo, cu ley pa tur cos. Ley pa casa matrimonio homosexual, pero unda nos grandinan ta? Nos grandinan no merece un ley pa proteccion?” Melva Croes-Yanes a señala.

El a subraya cu ora e grandinan ta bay keha algun caminda, hendenan no ta tuma nan den serio. “Nan ta bisa, ah no, Alzheimer e tin!” “Awendia, ora bo tin un tiki cabey blanco, ya caba Alzheimer bo tin”, el a expresa. Edadismo, el a reitera, cu ta discriminacion contra hende di edad y masha hopi mes e ta sosodiendo aki na Aruba.