Minister Glenbert Croes a cumpli cu su mision na Spaña:
ORANJESTAD (AAN) Minister Glenbert Croes a trata e tema di energia, durante e conferencia di prensa di Gobierno, Dialuna di e siman aki.
E mandatario a señala cu manera henter nos pueblo sa, el a cumpli cu su mision na Spaña na unda el a reuni cu tres compania di gran importancia, un di nan ta ACCIONA energia, cu ta trata e proyecto pa produccion di hidrogeno berde, p’asina construi y realiza e refineria di hidrogeno cu ta bay produci esaki atravez di e proceso di Electrolisis.
“P’asina nos tin no solamente hidrogeno como e fuel di futuro pa loke ta trata loke nos economia y nos biba na Aruba ta demanda. Pero como desaroyo, cu ta bay wordo realiza riba tereno di e refineria, hopi di loke nos ta wak aworaki, cu ta e refineria den mal estado ta bay wordo transforma den e planta di produccion di tur loke ta deriva di hidrogeno”, e mandatario a señala.
E dignatario a agrega cu esaki kiermen cu nan ta bay produci loke nan ta yama e ifusenan: iGasoline, iJet fuel, iDiesel, etc. “Pues diferente deriva di hidrogeno, atravez di un planta di un proceso hidrokimico, y esaki ta bay bira practicamente, henter e desaroyo di transformacion di e zona di e refineria.
Minister Glenbert Croes a subraya cu p’esey Enseñanza Pa Impleo na San Nicolas, ta bay ta asina importante. “E cursonan y e hecho cu a identifica cu na San Nicolas tin asina hopi hende pa traha den e refineria, cu tin e talento y ya caba tin e formacion aki, ta un oportunidad grandi nan tin. E conocimentonan laboral pa asina traha den e refineria unda cu den e cuadro aki, nos a papia cu Siemens Energy, cu ta un compania ‘world players’ grandisimo, di gran trayectoria, y credibilidad, unda cu nan ta produci e plantanan di electrolysis pa genera hidrogeno”, e mandatario a indica y a menciona tambe cu tin varios pais cu ta interesa den traha cu Aruba riba produccion di hidrogeno. Esaki ta yena gobierno cu gran entusiasmo.
