ORANJESTAD (AAN): Ariba 29 di october ultimo, Stichting BOB Aruba a ahusta su acta notarial pa cambio di nomber y expansion di su mision pa inclui screening di cancer di tripa y tambe boca di matriz.
Consecuentemente nos ta orguyoso di anuncia un desaroyo importante den nos structura di maneho.
For di e luna november 2024 e directiva a pasa pa bira un Conseho di Supervision (Raad van Toezicht). E transicion aki ta alinea cu miho practica di gobernacion (Good Governance), fortaleciendo e guia strategico y asegurando e desaroyo sostenibel di e fundacion.
Raad van Toezicht di Fundacion ABO ta consisti di Janice Ho-Kang-You -Arends (voorzitter), Ramphis Tromp, Michelle Wever, Atwell Aniceta y Marjory Clark.
Den cuadro di e mesun desaroyonan aki, ta felicita sra. Nanine Ponson, cu su nombramento como Managing Director di Stichting ABO. sra. Ponson a sa di compronde e necesidadnan bon y ehecuta e vision strategico den solucionnan practico. Su liderazgo lo ta crucial pa guia Fundacion ABO den su siguiente fase di crecemento mientras ta sigui amplia e programanan preventivo.
E cambionan aki ta refleha e compromiso di Fundacion ABO pa fortalese nos fundacion pa futuro y sigui ta un proveedor confiabel di cuido preventivo, den forma accesibel y di calidad halto pa nos comunidad.
E fundacion ta gradici tur partner den e cadena di cuido, tur stakeholder y muy especialmente tur e clientenan pa nan sosten continuo den nan fundacion y mision.
Fuente: Facebook Page Fundacion ABO
