ORANJESTAD (AAN): Sra. Magaly Maduro di Soroptimist y tambe presidente di e 'joint committee' di 'Orange The World',
cual ta encera 16 dia di activismo, a duna di conoce diahuebs mainta den un conferencia di prensa cu e aña aki ta bay pone atencion atrobe riba e problematica di violencia entre pareha, famia, cual ta mira cu dia pa dia ta continua den comunidad.
Maduro a indica cu den cuadro di esaki a laga cada organisacion mes fiha kico nan ta bay haci den e 6 dianan aki. El a haci un apelacion na comunidad completo pa entre dia 25 di november y 10 di december caminda cu lo tin e 16 dianan di activismo rond di Aruba, caminda lo tin tayernan y lo duna informacion tocante di e tema aki.
Rish-Ann Ammerlaan, Junior Case Worker di FCVR a reitera cu den e dianan aki lo para keto contra violencia pasobra e meta di e campaña ta alinea cu e mision cu e fundacion tin pa crea un Aruba sigur, respetuoso y cu hopi empatia pa tur esnan cu ta biba na Aruba.
E tema di violencia relaciona ta manifesta su mes den forma di manipulacion emocional, control economico of violencia domestico. "E ta un asunto cu ta afecta nos tur. E ta afecta nos famia, nos barionan y e sociedad completo. P'esey e campaña aki ta un yamada pa accion, pa recorda tur esnan cu ta biba na Aruba cu cada un di nos tin un rol hopi importante na e tema aki. Sea cu bo ta educa bo mes riba e importancia di relacionnan sano of bo ta yuda y ta un sosten pa esnan cu ta sufriendo di e problematica aki", el a expresa.
Durante e 16 dianan aki, FCVR conhuntamente cu otro instancianan ta organisando diferente actividad cu e meta pa asina empodera sobrevivientenan, crea conscientisacion, promove prevencion como tambe seguridad y responsabilidad, Ammerlaan a indica.
Dia 28 di november proximo, FCVR, UNHCR y HIAS lo tin anochi di pelicula na Cas di Cultura. Esaki ta completamente gratis. Lo haci un analisis di e pelicula pa compronde mas tocante e tema di violencia.
Tambe lo ta bishitando diferente instancia y lo ta den Caya Grandi repartiendo un calendar special cu storianan di sobrevivientenan cu ta comparti esaki, el a agrega.
Finalmente, Rish-Ann Ammerlaan a haci un invitacion un biaha mas pa forma parti di e lucha aki."Ban mustra mas empatia, comprension pa e personanan cu ta pasa den e problematica y educa nos mes riba e tema aki.
