FUNARI ta organisa nan prome 'Fun-Walk & Run'

Diadomingo 1 di Augustus  - ORANJESTAD (AAN):   Fundacion FUNARI a convoca un conferencia di prensa pa asina presenta e proyectonan cu nan tin pa e proximo lunanan.

Lila Mackay, directora di e fundacion a splica cu FUNARI ta conoci pa atende personanan den rolstul, hende grandi pero tambe hende hobennan.

E meta ta pa involucra hobennan den nan programa pa futuro, Mackay a splica.

Jeandre Henriques a duna di conoce kico su tarea ta den e proyecto aki. El a haya e opdracht pa diseña un logo nobo pa FUNARI. "Maske mi tin mi limitacion fisico, mi por haci hopi cos riba mi computer y un parti di esaki ta diseña cosnan digital", a expresa.

El a agrega cu e ta hopi contento di por a haya e chens di diseña e logo pa asina demostra su talento. E ta spera cu otro companianan por sigui e pasonan di FUNARI pa nan tambe por duna chens na hendenan cu limitacion pa demostra nan mes.

Richi Statie, a agrega cu su tarea ta pa organisa mas actividad posibel y su prome idea tabata un 'fun-walk & run' pa saca tur e hendenan den rolstul afo.

Glennon Eights di Sports for You a sigui bisa cu for di hopi tempo ta apoyando Richi pa haci e evento aki posibel, sin laga afo cu lo sostene den tur forma.

E evento ta bay tuma lugar dia 1 di Augustus for di 7 am. E registracion ta inicia 6 am. E ta bay sali for di FUNARI bay direccion La Granja - Santo Largo na Savaneta, cual ta un caminda basta comodo. E ruta largo ta bay ta 5 kilometer y ta bay tin un ruta mas cortico di 1.5 kilometer pa esnan cu no tin custumber y toch kier participa. E 'fun-walk & run' ta pa hende di tur edad

Polis ta bay tey pa cera caminda pa seguridad di tur participante, Eights a señala.

E intencion ta pa duna apoyo na e hobennan aki cu ta bay cuminsa cu diferente proyecto y pa motiba mas hoben pa yega FUNARI, a indica

Pa registra por tuma contacto cu FUNARI.