PHILIPSBURG: Un boletin emiti pa Ministerio Publico na St. Maarten a indica cu nan a cuminza cu un investigacion criminal preliminario pa cu e derame di azeta cu a socede Diamars den area di e planta di energia di e compania di utilidad GEBE NV, den Cay Bay.
E derame di azeta aki a converti su mes den un mancha di azeta cu a drief y sali for di Cay Bay y tambe Simpson Bay, y awor ta moviendo riba lama Caribe direccion Virgin Islands.
E boletin emiti Diahuebs atardi door di Ministerio Publico, ta indica cu Fiscal a reuni e siman aki mes cu Guardacosta di Caribe Hulandes, tambe Cuerpo Policial di St. Maarten, Departamento di Inspeccion di Ministerio di Infrastructura y Medio Ambiente, y e Departamento di Inspeccion Maritimo di Ministerio di Transporte, pa coordina actividadnan y lanza e investigacion criminal preliminario.
Ta bay check kende ta responsable cu asina hopi azeta a plama bay den lama. Y awor como cu e investigacion ta apenas cuminzando, Fiscal no kier a bisa nada mas pa awor.
