Parkinglot di Botica pa One Healthy Day...
ORANJESTAD (AAN): Diadomingo awor, lo tin One Healthy Day cu ta rond Aruba, unda diferente parti lo mira demostracion di un of otro deporte.
Den un entrevista cu Azriah Palm di Fundacion CVA Aruba, el a bisa cu riba parkinglot di Botica di Servicio Eagle, lo bay tin diferente instancia cu ta duna informacion, y tambe lo tin chens di haci chekeo medico.
E servicio na publico aki lo ta for di 8:00 am te cu 12:00 pm, y ta pidi hende bin na yuna pa haci chekeo y mira den ki situacion nos ta bibando aden. Pues despues di Diasabra anochi 11:00 pm, no come ni bebe nada mas.
Despues di haci e check, nan lo dunabo conseho kico pa haci. E parti mas grandi ta prevencion cu ta den bo mesun man.
E ta gratis na Botica di Servicio Eagle su parkinglot.
Un actividad di salud pa asina bo por pone atencion bek riba bon direccion. Debi na pandemia largo aki, hopi hende a djis stop di haci test. Pues esaki ta un bon chens pa bo haci un jump-start bek pa sa e condicion actual di bo salud.
Fundacion CVA ta conoci pa yuda comunidad pa nan haya sa con nan salud ta. Lo check bo peso, bo BMI di curpa, porcentahe di vet na bo curpa, presion di sanger, cholesterol, y sucu. Tambe lo haci un chekeo di bista.
Bo por haya informacion gratis di salud mental, di problemanan cardiovascular, con pa come cumidna saludable, movimento, y con pa cuida bo mes di diabetes y trata bo curazon bon.
