Fenomenal cena di Pasco pa miembronan di Aruba HOG 297

Speedworld 

Saludos cordial na tur amante di velocidad y motor, bo sirbidor Hubert ‘The Furai’ Tiel cu e saludo cu hopi cambio di gear pa sigui bay dilanti.

   Como cu temporada di fin di aña ta yegando, a nota cu Aruba HOG 297 a tene nan Christmas in November Ride 2023, y esaki tabata na Club San Martin na Santa Cruz.

   Y e tabata un momento hopi ameno, caminda amigonan a topa otro pa asina combersa riba loke e aña cu ta tras di lomba a nifica pa nan, papia riba tur e cosnan bon, adelantonan, y diverticion cu nan a pasa hunto coriendo nan bikes.

   E miembronan cu nan invitadonan a goza di e cuminda cu a inclui sopi di carni, tambe un mini-ayaca.  E cuminda principal mes tabata e Ham di Pasco, Galiña Yena, Carni Porco, y Filet Mignon.  E loaded mashed potatoes tabata algo exquisito, y e salad bar tabata hopi bon gestock.  Sin papia mes di e postrenan na final.

    Riba combinacion di potretnan por mira mas di e fabuloso celebracion, y di awor caba Aruba HOG 297 ta desea comunidad, y tur hende den mundo di motor, un feliz Pasco y prospero Aña Nobo 2024.