PHILIPSBURG: E Parlamentario independiente Christophe Emmanuel a declara e siman aki, cu e situacion financiero di e compania NV GEBE ta critico,
y ta “mas espantoso cu a yega di wordo bisa”, bisando cu tur nan cuentanan ta den negativo, y cu tarifanan exorbitante ta wordo paga tur luna na conseheronan.
Un publicacion den e corant The Daily Herald, ta mustra cu segun Emmanuel, e situacion financiero ta trece preocupacion pa cu e stabilidad di servicionan esencial cu nan ta duna comunidad, y pesey ta haci un suplica pa haci un investigacion completo pa cu e maneho financiero di e compania di electricidad. El a bisa cu e account di GEBE na Windward Islands Bank (WIB) na Florin, ta indica cu e ta den negativo cu 5 miyon Florin, y un account na Dollars cu ta negativo cu $400.000.
El a haya sa cu e account na Dollars na e banco, segun acuerdo, no ta wordo permiti pa bay den overdraft, pero toch e account aworaki ta den cora. Esaki ta resulta den un debe substancial di 7 miyon Florin cu e compania debe e banco.
El a bisa cu ademas di e mal maneho financiero, tin e gastonan excesivo riba Consultantnan, incluyendo e compania T&R Consultants cu ta hayando $65.000 pa luna, ta pagando DCC Consultants e suma di $10.000 pa luna, y un consultant mas Jacqueline Louis ta haya $6.000 pa luna. El a menciona cu Jacqueline ta manager di campaña pa e candidato Ohndae Marlin di Partido National Alliance.
El a menciona aun mas hopi gasto cu GEBE ta haciendo na companianan di computer, y tur esaki ta sigui pusha e compania di electricidad den un zona critico.
