ORANJESTAD (AAN) – Stanley Dabian, vocero di Departamento di Cultura Aruba, a hiba palabra den e conferencia di prensa tocante e proximo concierto “Un canto pa mi tera”.
Dabian a menciona cu DCA ta contento di por forma parti di e concierto aki, den e parti educativo. El a splica cu e tarima di Cas di Cultura lo haya un sabor y un creatividad artistico tanto local como internacional.
El a referi na e cantante Angela Croes, cu no ta un persona bon conoci na Aruba y internacionalmente. El a bin Aruba como profesional na aña 1981, el a encanta cu e Isla y a haci di dje su di dos cas, y como actriz y cantante aworaki e tin cuater aña como artista plastico y e ta bin presenta tur su arte pa pueblo di Aruba y e parti educativo pa alumnonan di scol.
Stanley Dabian a expresa cu e dianan 25,26 y 27 den Cas di Cultura lo haya un sabor di canto y e beyeza di baile, y e musica pa encanta bo alma. Dentro di e espectaculo lo tin actuacion tambe, pues e concierto y show aki lo ta algo sin igual.
Tambe ambos anochi Angela Croes lo tin exposicion di su obranan traha cu boter y di pintura cu yama “My secret faces”.
Tambe tin tayernan pa scol, pasobra DCA ta kere den proyectonan asina cu tin e aspecto di educacion, arte y cultura. “Pesey nos ta invita henter Aruba pa bin apoya nos Angela Croes cu, entre tanto e ta di nos tambe, pa den e concierto aki ‘Un canto pa mi tera’ e ta trece su tera cu ta Spaña pero e ta hacie pa Aruba. Kiermen, no perde esaki. Y henter e evento aki ta bay segun regla di protocol di DVG”, Stanley Dabian a subraya.
Seguidamente e primerisima artista local Diana Anthonette a hiba palabra y a expresa cu pa su persona ta un privilegio di por participa den e Concierto aki, di Angela Croes. “Nos ta conoce otro pa basta aña caba, el a yega di participa den mi shownan, mi a yega di balia cune, y e ta algo fantastico. Tempo cu mi a biba na Hulanda mi a ser conoci cu e Flamenco y el a haci mi algo cu mi no por scucha e musica. Pues, na momento cu Angela a bin cu e concierto aki, anto el a acerca mi, di biaha mi a bisa si. Lo mi tin gana di participa pasobra e ta algo unico.
Ta prome biaha na Aruba cu e publico lo presencia un concierto asina di flamenco, cu artistanan di Spaña; e musica ta sublime y naturalmente, e bailenan tambe, y e canto special di Angela Croes”, Diana Anthonette a expresa.
