Famoso galan di novela Mexicano a fayece y fanaticonan ta inconsolable

Andrés Garcia a nace na Republica Dominicana pero a luci na Mexico

MEXICO CITY: E galan actor di novelanan na Mexico, esta Andrés Garcia a fayece cu 81 aña di edad.  E tabata conoci tambe como actor di cine.  E tabata hospitaliza pa algun dia caba debi na complicacionnan di su salud, di cual desafortunadamente e no por a recupera di dje.

   E noticia di e morto di Andrés Garcia a wordo duna door di su casa mes.  Pero el a plama rapidamente ora cu e cantante Anahí a haci mencion di esaki, y cu mesora condolencianan a cuminza drenta.

   E tabata hospitaliza desde final di Maart debi na un pulmonia bacterial, y tambe e actor tabata sufriendo di cirrosis, cual malesa nan a diagnostica aña pasa di dje.

   Andrés Garcia a nace dia 24 di Mei 1941 na Republica Dominicana, pero ora e tabata mucha el a muda cu su famia pa Mexico.  E actor a cuminza su carera cu 25 aña di edad, participando den e pelicula ‘Chanoc’ cu a estrena na 1967, y unda el a comparti credito cu German ‘Tin Tan’ Valdes.

   Dos aña despues, na 1969 el a forma parti di “Los Juniors”, un pelicula mexicano den cual a actua otro figuranan destaca di cine nacional, manera Claudia Islas.

  Andrés Garcia a bula bay pa TV na 1970, y a participa den mas di 15 telenovela, y algun programa di TV.  Pero toch e tabatin un trayectoria mas grandi riba pantaya grandi cu mas di 30 pelicula den su biografia.

   E actor a casa cu Sandra Vale na 1967, nan tabatin dos yiu esta Andres Jr. y Leonardo.  Despues el a mantene un relacion cu Fernanda Ampudia, kende ta mama di su tercer yiu muher, Andrea.