Aparentemente DVG a regla permiso p’e:
ORANJESTAD (AAN) – Un bez mas Dentista Hendrik Marsman ta haci denuncia di un persona cu ta trahando na Aruba, sin cu e ta cumpli cu e exigencianan pa traha cu boca di hende. Ta trata aki di un tecnico dental, y cu aparentemente el a haya un carta regla pa DVG.
Marsman den un entrevista cu DIARIO a recorda cu 18 luna pasa, el a trece dilanti e caso di e Orthodontist Kawaya, unda el a bay prensa. Hopi hende a bise cu e ta loco y cu tin envidia, pero a resulta cu ta berdad cu e tabata traha sin diploma, y e pregunta ta con a bin cu DVG a lague drenta Aruba y ki medida DVG a tuma y, “cual cabes a lora”.
Dr. Marsman a duna di conoce cu Recherche a yam’e pa e bay nan despacho como testigo, puntr’e con bin cu un papel interno, unda nan a fix un permiso pa un tecnico dental, sin base riba ley, pa traha cu boca di hende, a yega den su man. E ta puntra si nan ta spanta den DVG cu e por a saca e papel ey.
Marsman a bisa cu e papel aki a cay den su brievenbus, pasobra tin hende cu tin miedo di bay prensa, denuncia e cosnan aki cu ta pasa y no ta bay segun ley. El a bisa cu el a haci un denuncia contra e tecnico dental aki y, aparentemente, IVA a papia cune pa no haci propaganda y siman pasa el a bolbe saca propaganda via facebook.
Segun Marsman awo e meneer aki a bira academico y specialista tambe. Pues, e ta duna hende informacion robes, y ta gaña e pashentnan, y e pueblo cu e ta un specialista y academico.
Marshman a sigui bisa cu e ta bon den su ofishi di tecnico dental, kiermen e ta traha diente pa dentista. E ley cu tin actualmente na Aruba ta bisa cu un tecnico dental, riba un carta di dentista, por haci un trabao den boca, pero si no tanten cu un pashent tin un solo diente caba na su boca, e ora ey e no mag di traha den dje, e ta prohibi. Pero toch na grandi e ta haci e trabao ey.
Tecnico dental no ta cay bao AruBIG, pues na unda ta bay keha? Hendenan no kier duna keho pa no pasa den full e procedure.
Un dentista ta wak e patologia, si e pashent tin carni diente y si tin caries, prome cu pone algo den su boca. Marsman a reitera cu e meneer en cuestion no ta academico, no ta dentista, y e por traha solamente cu un carta di referencia di un dentista. IVA mester implementa e ley. Por ta, DVG ta pone maneho pero si e ta pone maneho cu no ta segun ley, ken ta controla DVG? Pasobra eynan algo a bay robes cu su papel. El a señala cu AruBIG ta mitad trabao a haci, tin 21 parlamentario na Aruba, un di nan ta dentista, nan a pasa e leynan cu hopi cos no ta cubri, anto e ta amplio habri pa e tipo di cosnan aki pasa.
