Famia na Aruba den shock y tristeza cu asesinato cruel na estado Tachira

Sucedido e siman aki na Venezuela

ORANJESTAD (AAN): Un asesinato basta cruel a socede Diaranson marduga na estado Tachira, y esaki a causa un shock te na Aruba!  Esey ta debi cu e ruman muher di e victima ta biba na Aruba, y nan keda hopi kibra y tristo cu e informe aki.

   E señora local, Isabel Croes ta conoci pa su cancionnan cu e ta lanza den temporada di Pasco na Aruba cu ta forma parti di composicion propio.  Na December 2021 mes, el a lanza e hit ‘Que Bella Historia’ cu a wordo toca na hopi emisora local y a haya un bon posicion den Top 50 di Pasco.

   Diaranson marduga Isabel a haya yamada tristo for di Venezuela, cu un homber a mata su ruman muher Fanny Marisol Lopez di 50 aña na ciudad La Fria, cu ta situa na municipio Garcia de Hevia, na estado Tachira.

   E victima Fanny Marisol ta biba na su cas hunto cu su yiu muher Ismary Roxana Lopez di 22 aña.  Poco tempo pasa, Ismary a haya pareha y a sali na estado di e homber Axel Perez Mejia di 34 aña.  Ora cu e tabatin 6 luna na estado, el a bin puntra su mama si ta duna permiso pa e homber tambe biba cu nan.  E mama no tabata hopi di acuerdo cu e idea aki, pero riba insistencia di e yiu muher, el a dicidi na permiti esey toch socede.

   Sinembargo rapidamente a bin nota cu e homber tin costumber di bebe for di control y ta bira burachi.  Anto ora e yega cas e ta comete yen fechoria.  Pero semper na final e ta wordo manda den camber y ta bay drumi, y asina trankilidad ta restablece.

   Como cu awor su yiu Ismary ta 7 luna caba na estado, tin extra cautela na cas, y pa Fanny Marisol esey tambe ta un momento pa cuida su famia mihor pasobra e ta bay bira wela.

   Diaranson marduga: Banda di 1’or di marduga mientras cu Fanny Marisol y e yiu Ismary ta drumi, diripiente nan a tende batimento na porta.  Fanny Marisol a core lanta y bay check.  El a ripara cu ta e homber Axel Perez Mejia a yega y ta sea bao influencia di alcohol of otro substancia, y ta hopi agresivo gritando manera alma malo pafo di cas.

   Fanny mesora a bisa su yiu pa no habri porta, pa evita problema e marduga ey.  Sinembargo toch e porta a wordo habri, y Axel Perez Mejia cu agresividad a cuminza discuti cu Ismary.

   E discusion a bay riba asunto di placa, y dado momento e homber a bira furioso, y a cuminza cu un acto violento contra Ismary.  El a pasa man pa un biga, y cu esaki el a cuminza dal e dama hoben indefenso na un forma hopi serio na su cabez, na su wowo, y demas parti di curpa.  Cu e biga el a keda dal e barica grandi masha duro mes, causando hopi dolor.

   Ora cu Fanny Marisol a yega pa asina defende su yiu muher, ata e homber Axel Perez Mejia a cuminza dal e dama aki tambe cu e biga na un forma violento.  Despues el a pasa man pa un cuchiu, y a hinca esaki den curpa di Fanny Marisol na altura di su parti delicado.

   Purba di kima nan: Comosifuera poco, el a pasa man pa un obheto similar cu un torch, y al a trata di kima Fanny Marisol cu e candela aki conecta na un boter di gas.  Cu e torch el a kima e cara di e dama na un forma fuerte.

   Despues el a bay y kima su pareha Ismary tambe cu e tipo di torch aki na tur dos braza, na su parti patras, y demas parti di curpa.

   Comosifuera poco, el a trata di bay kima e cas tambe na final, pero e no a logra.  Y su furia causa pa su influencia di alcohol of droga, a pone cu na final el a sali di cas semi-sunu, ta gritando y expresando su mes na voz halto.  Tur esaki a spierta e bisiñanan y bin mira pafo kico ta pasando.

   Ora cu nan a ripara kico a pasa, esta cu Fanny Marisol ta abao sin reacciona, y cu Ismary ta tur na sanger, kima, y yen dolor, e fuse di a habitantenan eybanda a bula.

   Nan a yega cerca, subi caya y a cuminza wanta Axel Perez Mejia, y yena su curpa cu golpi.  E bisiñanan tabata cla pa lincha e homber aki.  Otronan a yama Polis, y nan a yega na tempo pa evita cu e hendenan furioso a mat’e eynan mes.

   A sali na cla cu e motibo pakico Axel Perez Mejia no a huy, ta debi cu ora el a basha combustible riba e cas pa kime, el a kima su mes tambe debi cu e ta asina burachi y combustible a basha riba su paña.  Su pecho robez tabatin quemadura.

   Mientras tanto mas personal di Rescate y Ambulans a yega pa asina brinda asistencia.  A bin constata morto di Fanny Marisol, cu tabatin curpa yena cu golpi, trauma, y quemadura.

   E dama hoben Ismary tabata na bida ainda, y nan a core hibe pa Hospital.  A sali na cla cu el a haya fractura di craneo, varios fractura mas na curpa, quemadura di 1er y 2ndo grado, quemadura na tur dos braza, na su parti patras, trauma fuerte na tur dos wowo, y otro parti di curpa.

   E golpinan fuerte di e biga na e barica, a pone cu el a perde e baby.  Docternan a haya nan obliga di saca e baby, y a keda sorprendi cu e fetus tabatin hasta herida di sanger na su curpa chikito.

   Famia inconsolable: Na Aruba a compronde, cu e dama local Isabel Croes ta inconsolable cu loke a socede.  Desde cu nan mayornan a fayece, e cas a keda atras pa nan ruman muher Fanny Marisol Lopez di 50 aña.  Cinco ruman homber a bay biba den exterior, y Isabel a bin biba na Aruba.  E ta casa cu e conocido ciudadano, taxista John Croes.

   Tin un tiki consuelo si cu Ismary Roxana Lopez a keda na bida, pero toch den situacion critico na Hospital.

   E dolor mas profundo awor ta cu frontera ta cera, pues no tin ningun chens pa Isabel viaha pa San Cristobal pa check e entiero di su unico ruman muher.  Ademas di esey, como cu na estado Tachira tin problema cu coriente y no tin coolers pa pone defuntonan aden, e entiero a socede ya caba Diabierna atardi 4’or.

   Accion di Protesta: Habitantenan di La Fria a keda disgusta cu e actitud di e homber cu a mata su suegra den e asunto aki, djis pasobra el a bay defende su yiu muher.  Nan ta haya cu e cantidad di asesinato di muher (yama ‘feminicidio’) ta aumentando demasiado na Venezuela.

   Pesey mes Diabierna despues di e entiero, nan a acudi dilanti oficinanan di Polis Cicpc cu un protesta silencioso pa busca forma pa stop e cantidad di asesinato riba muhernan.  Nan ta exigi castigo fuerte pa e homber Axel Perez Mejia aki.

   Na famia di Fanny Marisol Lopez, DIARIO ta extende su mas profundo palabra di condolencia.