Mas cupo riba avion no ta beneficio solamente pa vacacionista
*Recuperacion comercio mundial tin necesidad di comunicacion
*Pronosticonan economico mundial ta papia di crecemento na 2023
ORANJESTAD (AAN) — Na momento cu Ministro Dangui Oduber a anuncia cu na 2023, inicio lo wordo duna na vuelonan di British Airways pa Aruba, un aspecto sumamente importante den e reactivacion economico di Aruba, a keda presenta.
Generalmente ora papia di comunicacio aereo entre dos pais, no ta papia solamente di turismo pero di economia general di un mundo forma pa paisnan cu ta dependiente di otro riba tur tereno.
Manera na varios occasion DIARIO a trece dilanti, e Guera di Ukraina a haci cu e recuperacion mundial di e pandemia Covid-19, ta wordo spera awor na 2023.
Esaki ta nifica cu na 2023 ta spera cu actividad economico ta aumenta mundialmente loke ta nifica mas actividad den mundo comercial internacional.
Pa comercio por alcansa su meta, mester di comunicacion riba tur tereno y sigur di comunicacion aereo cu no solamente ta na beneficio di turismo.
Uno di e ramonan, cu ta crece den importancia pa turismo, ta hustamente e necesidad di biahe pa metanan comercial, cu ta produci turista cu pa nan trabou den sector comercial mester bira turista.
Na e momento pues cu Ministro Dangui Oduber a anuncia cu Aruba na 2023 lo conoce buelonan realisa pa British Airways, el a papia di posibilidadnan nobo pa empresarionan tambe, sigur si tene na consideracion e nomber cu British Airlines tin den mundo di aviacion y e loke e ta nifica ya na e momentonan aki pa Aruba.
British Airlines ta wordo considera e compania mas prestigioso di aviacion di Reino Uni (cu den publico tin e nomber di Inglatera).
Ta trata di un pais cu ta keda na Europa pero a bandona Union Europeo pa sigui su propio destino.
Prome cu Guera di Ukraine a rementa y hopi asunto a drenta lachi di olvido por lo pronto, hopi atencion tabata wordo dedica na desaroyonan economico na Inglatera y e atraccion cu e pais por bira pa companianan internacional di Europa, cu por prefera e posibilidadnan cu Inglatera ta ofrece.
2023 ta priminti di bira un aña sumamente interesante pa mundo y sigur pa Inglatera.
Aruba no mester spera 2023 haci su entrada pa nota e impacto cu entrada di British Airways tin pa e pais.
Ya no solamente na Reino Uni pero tambe na otro paisnan manera Hulanda, e siman aki e buelonan di British Airways pa Aruba a haya atencion den publicidad.
Corantnan ta haci mencion di e buelonan pa Aruba na 2023 y e posibilidadnan cu nan ta ofrece.
Esaki pues lo habri porta pa intercambio di turista for di Inglatera pa Aruba pero mester mira mas leu.
Na momento cu un compania manera British Airways anuncia cu e lo trece turista Aruba, portanan nobo ta habri pa Aruba como destinacion turistico pero tambe den otro ramonan di comercio.
Interesante ta cu biahe di comerciantenan tambe ta contribui enormemente na turismo y ta hasta conoci como uno di e formanan cu destinacionnan turistico ta bira conoci na otro pais.
Comerciantenan cu mester bishita un pais, den hopi caso ta dicidi di haci e pais tambe e lugar di vacacion di nan famia.
Ora papia di British Airways no ta papia di cualkier compania.
Entrada di British Airways cu tin companianan asocia den sector di turismo, sigur ta habri portanan nobo pa economia di Aruba, cu mester prepara su mes tambe pa gara e oportunidadnan comercial nobo, cu e conexion aereo entre e dos paisnan ta brinda y e forma cu Aruba por bira un hub di Reino Uni pa Latino America y vice versa.
DIARIO sigur lo sigui amplia riba e materia aki pa tene su lectornan informa.
