Regreso na patriotismo real y haci esfuerso pa registra logro --- *Un pais cu ta depende di importacion mester mira realidad --- *E inversion mas grandi di tur ciudadano ta responsabilidad
ORANJESTAD(AAN)—Uno di e publicacionnan mas importante den DIARIO di awe, sigur ta presentacion di Prome Ministro Evelyn Wever-Croes, kende a trece dilanti cu 2022 lo ta e aña di inversion.
Hopi interesante tabata e forma con Prome Ministro Wever-Croes no a presenta un panorama di fantasia pero a splica tambe con e inversion di esfuerso di henter un pais, ta hiba na e logro di oportunidad nobo pa futuro.
Un contenido realistico a wordo duna na e palabra “inversion” dor di Prome Ministro Wever-Croes kende a deshaci di e contenido normal di inversion cu ta duna inyeccion na oportunidadnan nobo na un pais.
Na e momentonan aki Aruba mester pensa bon kico ta spera e pais, cu mescos cu henter mundo, ta enfrenta e situacion provoca pa Covid-19 cu ta basha e mundo cu nos a conoce te awor, abou.
Ora mira atras kico a causa mas problema pa mundo, por mira e teorianan di fantasia cu cual populismo, e buskeda di popularidad di politiconan, a atende cu ciudadanonan di paisnan na tanto pais na mundo.
Biba di loke no tin, biba di prestamo ta e formula cu a destrui cantidad di pais, cu a wordo manipula pa politica.
E realidad di Argentina por ehempel cu a crea un candena di prestamo cu ni e Fondo Monetario Internacional por a soluciona.
Aruba tambe a cay den e situacion den cual inversion a wordo uza pa Pueblo no mira con placa di Pueblo tabata wordo uza na un forma iresponsabel, cu a laga e caha di Pueblo bashi y asina a hinca Aruba den un situacion di angustia ora Covid-19 a bati na porta.
Inverti ta e palabra di aplicacion gubernamental cu mas lo wordo expresa na mundo, caminda sin duda mester di capitalnan cu ta wordo inverti den restauracion di economianan cu a basha abou.
E capital mas valioso di un pais ta keda ciudadanonan, cu a wordo prepara pa nan tarea pa hinca nan conocemento, nan esfuerso den nan pais.
Awe e mihor inversion den Aruba ta basa riba patriotismo cu ta exigi e responsabilidad enfrente un pais, cu mester si importacion pa sobrevivi.
Importacion ta haci recuperacion mas dificil pasobra e pais ta depende hasta pa e productonan pa traha e pan cu e ta come, di exterior.
Ora papia awe di exterior ta papia di un mundo cu ta hoga practicamente den e problema di Covid-19 y cu mester di aliento nobo pa sigui cana.
Inversion y oportunidad nobo sigur lo ta presente na 2022 ora un mundo nobo pero tambe manera nos a mustra na tanto ocasion mester wordo crea.
Un Aruba nobo basa riba patriotismo real cu ta responsabilidad cu mester cuminsa for di awor y cu mester expresa su mes den nos esfuersonan pa pone un fin na e pandemia.
Esfuersonan chikito manera bisti un mask, Esfuersonan pa construi den situacion dificil.
Den proximo edicionnan sigur nos lo sigui amplia riba e documento presenta pa Prome Ministro Wever-Croes pa 2022, cu ta contene e reto di responsabilidad como e inversion mas importante di un Arubiano den Aruba!
