Ronella Croes:
- \Nos beachnan y seguridad di nos isla ta importante den esaki
ORANJESTAD (AAN): Diamars mainta despues cu oficialmente fase dos di e proyecto di Baby Beach a wordo entrega, CEO di Aruba Tourism Authority (ATA) Ronella Croes a hiba palabra.
El a gradici tur esnan cu a traha duro riba e proyecto y el a bisa cu ta bunita ora cu por wak con bon tur cos a keda.
“Pa ATA no solamente e ta cumpli cu e maneho nacional di turismo, pero tin un pakico cu e maneho nacional ta dirigi riba e producto turistico”.
Como tal, como ATA nos a inverti 10 pa 15% di locual nos ta gasta den e producto turistico, mirando cu e ta importante pa e experiencia cu nos ta ofrece como Aruba, pa nos sigui mehora y eleva esaki unda cu por.
Ta importante tambe sinembargo, pa alinea esaki cu locual ta bon pa nos comunidad, segun e CEO di ATA.
El a sigui bisa cu e ta pa nos turistanan y pa nos comunidad.
Segun Croes, ora cu e inversionnan ta wordo haci, ta mara cu loke ta importante den e sector turistico.
Dos parti importante di esaki ta e calidad di nos beachnan y e seguridad di nos isla.
Errol de Freitas, presidente di San Nicolas Business Association (SNBA) tambe a hiba palabra y el a indica cu e ta contento cu e master plan sigur tabata dirigi riba pueblo di San Nicolas y riba nos turistanan.
De Freitas a sigui bisa cu e ta contento cu e desaroyonan rond di Secrets Hotel y cu e ta spera cu e proyecto keda cla den e tempo stipula.
El a indica tambe cu el a papia cu e minister tocante di e anker cerca di entrada di Seroe Colorado y cu a ta completando un diseño pa esaki.
