Expertonan ta evalua decisionnan gobierno riba tereno cuido medico
*Decision pa prijs di remedi ta cuadra cu recomendacion IMF na Gobierno
*AruBig ta trece personal medico for di pais caminda Arubiano ta bay dokter
ORANJESTAD (AAN) — Dos di e puntonan mas importante cu a wordo anuncia siman pasa, tabata e informacion di parti di Prome Ministro Wever-Croes cu no ta bay exigi pueblo paga mas pa remedi di AZV mientras cu Ministro di Salud Publico Dangui Oduber a mustra cu e ta cla pa permiti personal medico di cantidad di pais cu ta cualifica, traha na Aruba.
DIARIO a atende e materianan aki cu expertonan riba tereno di cuido medico cu a mustra cu e decision sigur mester di nan aprobacion.
Pa loke ta trata e hecho cu lo habri porta pa profesionalnan cu a studia den na paisnan cu no ta Hulanda y Merca, a wordo mustra riba e realidad cu un cantidad di Arubiano semper tabata bishita dokter na paisnan Latino sigur ora nan tabata kier un segundo opinion.
E informantenan a mustra cu e medida aki a bini na momento cu mundialmente cuido medico y e cantidad necesario di personal ta na discusion.
“Aruba tabata depende di profesionalnan cu e tabata atrae a base di e sistema di registro BIG, cu tabata limita e cantidad di profesional riba tereno medico cu Aruba por atrae,” informantenan a indica.
Nan a mustra cu e oferta di parti di profesionalnan na paisnan cu BIG no tabata permiti, semper tabata existi pero Aruba mester a tene su mes na e sistema cu tabata limita e profesionalnan cu e por a atrae.
E anuncio di Ministro Dangui Oduber di Salud Publico sigur a cay den bon tera cerca informantenan cu a mustra tambe riba e forma cu el a atende cu e asunto y no sin mas a habri e posibilidad pero a exigi debido estudio di e materia.
Hopi positivo tabata reaccionnan tambe riba e decision di gobierno manera anuncia dor di Prome Ministro Evelyn Wever-Croes pa loke ta trata e pago di remedi di AZV.
Manera DIARIO a indica, e medida a wordo tuma bou presion di Hulanda pa Aruba a haya asistencia financiero.
Pero cu lo a bolbe na mesa cu Hulanda pa atende e punto aki, a bini dilanti for di momento cu e delegacion di IMF a bini Aruba y emiti un rapport den cual nan a elogia e forma cu Gobierno Wever-Croes a atende e pandemia na Aruba y e medidanan cu a tuma.
Sinembargo, a wordo papia tambe riba e peso cu pago di remedi ta nifica pa pashentnan sigur na e momentonan aki. Gobierno di Aruba tabata di acuerdo y a mustra cu lo bolbe na mesa cu Hulanda riba e asunto aki.
Mientrastanto a wordo dicidi di parti di AZV cu nan no ta paga un lista di remedi mas, loke a causa un peso pa hopi grupo den comunidad.
Fin di siman pasa, Prome Ministro Wever-Croes a anuncia cu ta deshaci di e regla pa paga pa remedi.
Un asunto sumamente importante segun informantenan cu a bisa cu hopi hende na Aruba tabata den problema serio y lo a hasta scrap cierto remedinan.
Por papia di elogio grandi pa e decisionnan di Prome Ministro Wever-Croes y Ministro Oduber riba tereno di cuido medico.
DIARIO ta en espera di mas informacion den detaye riba e topiconan aki cu sigur ta di impacto directo pa e ciudadanonan di Aruba.
