Exitoso seminario encuanto integridad y corporacionnan

ORANJESTAD (AAN): Diabierna siman pasa, riba e di cinco dia di Integrity Week a invita diferente organizacionnan den sector priva pa e seminario ‘Integrity & Corporations’.

   Den nos dia diario, den ambito personal como tambe profesional, nos ta uza un Compas Moral pa haci decisionnan. Esaki ta kico ta yuda nos ecohe entre bon y malo.

   Un lider den e sector priva tin un rol clave pa cu e nivel di integridad den su organizacion, industria y comunidad en general. Pues e bon uzo di un Compas Moral ta un deber cu mester worde eherci diariamente.

   Na e seminario a elabora ariba diferente concepto cu ta cai bou di integridad, a analisa casonan y a duna un actualisacion ariba kico gobierno ta haciendo pa eleva e nivel di integridad ariba Aruba.

   Minister Arends ta gradici Bureau Integriteit Aruba y CEO di Aruba Airport Authority Joost Meijs pa nan presentacionnan. Tambe ta duna danki na tur cu a atende e seminario aki.