Exitoso comienso di siman dedica na conscientisacion di Boy Ecury

Departamento di Cultura:

ORANJESTAD (AAN):  Diahuebs mainta a habri e siman di conscientisacion dedica na Boy Ecury cu e presentacion di e monologo titula 'Heroe Lubida', skirbi pa e conocido artista, autor di Teatro, miembro prominente den Kunstraad na Hulanda, Paulette smit. Bou di su direccion a tene algun luna pasa un casting bou di hobennan studiante na Hulanda cu ayudo di e organisacion Kompas presidi pa Deon Bisslik y Culture Generations di Conny Groot.

            Dos hoben a wordo selecciona y e training pa Teatro a cuminsa. Ta trata di Pierre Jourdain y Osvaldo Correa. Paulette Smit su profesionalismo y dedicacion ta obvio ora a presencia “E Heroe Lubida” diaranson nochi na Arubiana, departamento di Biblioteca Nacional.

            Hunto cu e presentacion sublime di Pierre Jourdain, algun school a entrega contesta di un “deelvraag” den e lesbrief cu a bay pa tur scol secundario, esta di expresa 'Kico Libertad ta nifica pabo?' E lesbrief ta traha pa docente di historia Adonsito Croes. Tur school avansa y tambe scolnan  basico a recibi lesbrieven.

            Di scolnan basico  e lesbrief a  wordo traha pa Olga Buckley, kende a traduci “E Heroe Lubida" na Papiamento. 

Participacion di Scolnan

            E studiantenan Educampus bou guia di Amber Sybersma a traha un video cu a hala hopi atencion. E contestanan riba e pregunta 'Kico abo lo haci na lugar di Boy Ecury?', a mustra con e pensamento di e hoben studiante ta y con e por cambia. Esaki ta un produccion hopi interesante y prometedor pa futuro.

            MonPlaisir College Mavo tambe a traha riba dos presentacion digital  'Ken ta Boy Ecury?' cu sin duda tin nan balor. E dedicacion, e investigacion cu a ser haci pa yega na e producto final, digital, ta prueba di esaki. Awor ta nan Arubiana pa inclui esakinan den e database digital di coleccion.aw.

            Sint Antonius College a traha riba un concepto nobo, creativo y hopi usa pa hobennan. Esaki a ser haci den forma di Tik Tok contestando e pregunta clave “Kico kiermeen Libertad pabo?”.     

Filomena College a traha pinturanan riba canvas di e cara di Boy den un estilo moderno, colorido y hopi diferente.

            Ta sigui e dianan venidero cu presentacion di e monologo “E Heroe Lubida” na e schoolnan avansa, 3e klassers.

            E meta di  Gobierno di Aruba, Departamento di Cultura Aruba y Fundacion Parke Boy Ecury ta pa comunidad di Aruba siña conoce y recorda un di nos heroenan nacional, cu ta fungi como simbolo pa hopi heroe Arubiano durante segunda guera mundial.