Cruz Cora Aruba ta celebra 67 aña di trabao comunitario

ORANJESTAD (AAN):  Diahuebs mainta, esnan di Cruz Cora a reuni pafor den famia pa hisa bandera y asina celebra 67 aña di bunita trabou humanitario.

            Sr. Stephen Daal, Director di Cruz Cora a splica cu dia 31 di October ta cumpli 76 aña y esey ta un bunita fecha pa bisa pabien na tur boluntario.

            Cruz Cora ta un organisacion cu ta basa su mes den boluntarismo y e boluntarionan ta haci e trabao. Tin un staff cu ta consisti di 5 pa 6 hende cu ta sostene e operacion di e organisacion. Pero gran mayoria, mas cu 100 ta boluntario, el a bisa.

            E trabaonan cu Cruz Cora ta haci ta varios. Tin un localidad na San Nicolas cu a keda renoba caminda ta cushina 3 of 4 biaha pa siman pa e hendenan cu no tin luga pa biba. Esaki ta un proyecto cu Cruz Cora ta haciendo pa basta aña caba.

            Na Dakota tambe tin e local cu tur hende conoce. Eynan ta duna les na companianan. Ta purba di educa y yuda e hendenan cu ta den sufrimento, Stephen Daal a indica.

            El a revela cu e interes pa bira boluntario no ta manera antes. Pero ta trahando cu EPI y cu Universidad di Aruba pa purba lanta e interes pa e hobennan bay yuda.

            Hopi biaha ta haya pensionadonan cu tambe ta dispuesto pa yuda, a agrega.

            Pa loke ta material a bisa cu nan tin suficiente. Nan a caba di haya un container di 20 pia cu material y nan ta completamente prepara pa desaster of cualkier otro evento cu nan ta getrain p'e.

            Continuamente nan ta haci training y ta keda educa e boluntarionan pa nan ta actualisa pa cualkier eventualidad, el a indica.

            E unico diferencia entre Cruz Cora y otro organisacionnan ta cu nan ta hopi rigido den investiga e situacion ora cu ta haya solicitud di ayudo, e director di Cruz Cora a expresa.