Ex-Ministro y diputado como tambe hefe di WEB Chenco Yarzagaray a fayece

ORANJESTAD (AAN): Diahuebs madruga a drenta informacion cu e conocido ex-director di WEB, ex-diputado, y ex-Ministro, esta Arsenio Chenco Yarzagaray a fayece na edad di 83 aña.

   Aunke mayoria di su famia ta yame Arsenio, toch publico en general tabata yame Chenco.  El a nace na Aruba dia 29 Maart 1938 y pa basta tempo ta biba den area di Mon Plaisir na Playa.

   Chenco pa hopi tempo prome cu el a drenta den politica, tabata conoci como e hefe na e planta di awa y electricidad di WEB na Balashi.

   E prome biaha cu Chenco Yarzagaray a aparece riba lista politico, tabata na 1974 ora cu Partido MEP a participa pa prome biaha.  Arsenio a aparece na puesto 24 riba e lista.

   Den su bida politico, el a fungi como Diputado pa MEP, y tambe como cu Aruba e tempo ey ta haya asiento den Gobierno Central, Chenco a fungi tambe como Ministro.

   Na November 1979, Gobierno di Antiyas a wordo forma cu Don Martina, y aki Chenco Yarzagaray a bira Ministro di Asuntonan Economico, y tambe a fungi como Vice-Prome Ministro.

   Como Director di Water- en Energie Bedrijf (WEB), el a pasa den momentonan dificil ora cu Aruba tabatin problema pa cu produccion di awa, y cu esaki dado momento a hasta afecta Refineria di Lago.

   E tempo ey Lago tabata importa awa via barconan tankero tanto for di Rio Caroni di Venezuela, como tambe Hudson River na New York.  Pero e awa cu nan tabata busca di Venezuela a sali masha caro mes (como 300.000 Dollar), y Lago a keda kere cu nan lo sigui haya awa di Hudson River.  Pero piscadornan na New York a protesta, y e ora e cranchi di awa for di New York pa Aruba tambe a cera.

   E ora Gobierno di Aruba mes a manda un delegacion pa bay papia cu Gobierno Venezolano pa check si por busca awa bek di Rio Caroni.  Na 1983 e delegacion di Aruba a wordo ricibi pa President Dr. Herrera Campins, y tambe door di Ministro y politiconan di Partidonan AD y tambe Copei, y a papia tambe cu Rafael Caldera, Carlos Andres Perez, y Haime Lusinchi.  Tur esey pa purba convence Congreso di Venezuela pa tuma decision pa duna aprobacion pa e awa industrial aki por wordo manda pa Aruba.  Pero como cu e ta algo cu ta cay na nivel di Reino Hulandes, a pone e Embahador Hulandes na Caracas tambe na altura.

   E delegacion di Aruba a consisti di diputado Efrain de Kort, diputado Daniel Leo, consehero huridico mr. Roy Wever, y director di WEB, esta Chenco Yarzagaray y administrador Gabriel Werleman.

   Chenco tabata director di WEB tambe tempo cu tabatin problemanan famoso cu split-tube na e boilernan cu tabata causa blackout cada rato, y a traha pa busca solucion pa reduci esakinan.

   Chenco a fayece Diahuebs madruga rondona pa su famianan.  Na tur esnan cu a conoce Chenco, su famia, y demas amistad, DIARIO ta extende su mas profundo palabranan di condolencia.