Alexa Werleman cu suplica --- ORANJESTAD (AAN): Diasabra lo tin entiero di e gran locutor y personahe Roberto Geerman.
E union cu Roberto Geerman semper a boga pe, pa bin den Medionan di Prensa na Aruba, ta parce di lo bira realidad riba su dia ora e ta bay wordo hiba pa su ultimo lugar di sosiego.
Robert Francisco Geerman, mihor conoci como Roberto, a fayece siman pasa. Un gran baluarte den radio difusion na Aruba, ta bay wordo despedi na un forma grandi y lo principal ta cu esaki lo bay socede den cadena nacional en vivo via diferente medio di prensa local. Lo tin un solo video y audio feed cu ta bay pa tur media.
Un di e miembronan di comision, Alexa Werleman kende tambe a traha hunto cu Roberto na Radio Galactica FM, a bisa cu Diasabra 29 di Januari 2022 for di 11:00 am te cu 2:00 pm, publico tin chens di pasa condoleer famia y despedi di Roberto, via un actividad di Walk-thru y Drive-thru riba plenchi Santa Teresita na San Nicolas. Bo ta drenta cu bo auto via di Torenstraat pa subi plenchi di Santa Teresita, y despues sali riba Bernhardstraat dilanti Misa.
E solo transmision aki ta pa duna Roberto su tributo, y esnan cu ta na cas y cu no por bay condoleer y despedi di Roberto, por mire na TV of scuche na radio.
Restonan mortal di Roberto lo pasa rond: A escoge pa haci e Walk-thru y Drive-thru aki, debi na e hecho cu tin algun miembro di famia cu estado delicado di salud, pues ta deseable pa no tin aglomeracion ningun momento eynan. E organizadornan ta prepara pa percura pa esaki no socede, y di awor caba ta pidi cooperacion di comunidad pa respeta e deseo di famia eynan.
Segun Alexa Werleman, nan tin prepara pa e mainta ey, pa laga e restonan mortal di Roberto pasa bishita e emisoranan cu mas el a frecuenta den su crecimento y bishitanan social, e.o. Welcome Back Snack na Solito, na Galactica FM, y despues bay San Nicolas y cuminza cu e despedida.
Famianan ta pidi pa no haci un ‘carnaval’ di e despedida aki, sino un tributo na tur loke Roberto a nifica pa comunidad.
Famia ta gradici pa e tributo: E sobrino di Roberto Geerman, esta Denzel Brown a hiba palabra y a bisa cu famia ta gradiciendo di awor caba tur esnan cu ta dunando cooperacion pa haci e tributo aki bira realidad.
Nan sa cu Roberto ta di pueblo di Aruba, y el a habri curazon semper pa kende cu tabata pidi pa yuda. Di e parti ey, como su ultimo dia hunto cu nos, lo bay uni y celebra su bida na manera digno. Semper Roberto a marca historia na su bida, y awor te na final nos lo keda corde pa semper.
Mieckey Gravenhorst na su turno a bisa cu Cuerpo Policial di Aruba lo duna colaboracion pa yuda coordina e Drive-thru aki riba Diasabra, pa yuda. Parti paden lo tin varios amigonan di Roberto cu tambe ta duna coordinacion, incluyendo Scouting Ora Ubao pa dirigi auto y hendenan cu ta bay pa condoleer tur hende.
