Salud Mental --- ORANJESTAD (AAN): El a ser presenta caba na pueblo! Esta cu desde cu e pandemia a cuminza na Maart 2020 na Aruba,
nan a nota un aumento di caso di personanan na Aruba cu tin di worde atendi pa asuntonan mental, y esaki ta encera mucha- y hobennan tambe.
Un top funcionario a hasta divulga algun tempo pasa den un entrevista cu DIARIO, cu cada siman nan ta keda haya 10 extra melding di mucha- y hoben pa atende. Lo peor ta cu aworaki tin un lista di espera basta largo, y por lo pronto lo sigui subi y complica e situacion pa e pashentnan, y pa esnan di Respaldo.
Loke e pandemia di Coronavirus nobo aki a trece cune, ta un urgencia pa expande servicio lo mas rapido posible.
Hecho ta cu na Aruba, e mucha- y hobennan den pasado ora di haya tratamento, esaki ta dura un promedio di 6 pa 9 luna. Pero awor e tratamentonan aki ta durando mas hopi, y e finalizacion di tratamento ta yega menos rapido. Pesey awor mes nan ta tumando 2 ‘intakes’ envez di e normal 10 ‘intakes’.
E pandemia ta trece hopi consecuencia pa mucha- y hobennan na Aruba, y esaki tin di haber cu e.o. e Shelter-in-Place unda obligatoriamente no por a sali di cas, mester a keda sin bay scol, y tur esaki a crea varios problema, incluyendo algun cu a bira adicto na videogames.
Ademas di esey, algun mucha- y hoben a keda confronta cu depresion, desorden general di ansiedad, desorden di comemento, a cuminza comporta nan mes malo, post traumatic stress disorder, psychosis, y hasta tin caso unda e hobennan kier a causa nan mes daño of mas extremo.
Tambe a haya situacion unda e hobennan ta worde impulsa pa factornan na cas, esta cu kizas nan Mama of Tata ta hospitaliza cu Covid-19, y debi na esey nan no por tin contacto, empeora cu e hecho cu entrada di cas ta cay debi na perdida di empleo. Pues e tin di haber cu malesa, pobreza, scol, y mas.
E ultimonan aki ta cay bao di factornan di riesgo, y haci mas grave pa loke ta pasando den nan bida e momento aki.
Pero como cu tin asina hopi pashent nobo cu tin di haya yudanza pa cu nan salud mental, esey ta treciendo cu e lista di espera ta birando largo. No tin cupo disponible pa atende tur hende mesora (solamente casonan extra urgente). Algun di e personanan aki tin di warda 1 aña prome cu nan haya turno.
