Ronella Croes: Despues di e prome kwartaal di e aña aki:
ORANJESTAD (AAN) – Director di Oficina di Turismo di Aruba, señora Ronella Croes, den conferencia di prensa di gobierno, a señala cu si premira despues di kwartaal 1 di e aña aki, Aruba tin tur e condicionnan pa por sigui e trayecto di recuperacion cu ATA tabata tin previsto pa e aña aki.
Pa loke ta condicionnan Ronella Croes a expresa cu: “mester pensa riba e asientonan aereo cu Aruba no a perde y tey ainda, cu por permiti nos transporta e cantidad di bishitantenan desea”, y a agrega “Ohala nos por mira Februari y Maart, cu menos impacto cu ta ilustra aworaki graficamente, pero bo por mira den e bara cora, hopi cla, cu na Januari compara cu loke nos a proyecta sigur e impacto di omicron tabata tey”.
Ronella Croes a expresa cu por mira, consecuentemente, con na Februari lo tin un tiki mas bishitante y na Maart un tiki mas, pero tur tres luna ta mustra un tendencia cu ta abao di loke ATA a proyecta, y cu pa resto di aña e lo por ta conforme na loke ATA a proyecta, of e por ta un poco mas abao cu esey.
“Di con nos ta bisa esey? Pasobra un cos nos a siña di Covid, ta cu tin hopi cos inespera cu por presenta nan mes ainda. Pero si tur cos bay conforme nos proyeccionnan, nos lo por ta cerando e aña ainda riba 90% di recuperacion, compara cu 2019.
Y pa ta un tiki mas conservativo, nos ta tene na cuenta cu si tin aspectonan inespera cu ta presenta, cu kizas un recuperacion di 80% e aña aki versus 2019”, Ronella Croes a remarca.
