Eleccion a confirma e encuesta despues di debate Camara di Comercio - *Formacion di Gobierno a bira un consulta y expectativa pa Pueblo - *Gabinete Wever-Croes a entrega su mes un encargo nacional dificil
ORANJESTAD(AAN)—Awe Aruba ta cuminsa skirbi un pagina nobo den su historia.
Miembronan di un Conseho nobo di Ministro lo presta huramento of lo priminti cu nan lo entrega nan mes na e bienestar di e pais Aruba y e Pueblo di Aruba, cu a conoce un concepto nobo di formacion di Gobierno.
Ta hustamente e concepto nobo di formacion ta central den nos analisis awe pasobra no solamente e ta papia di e forma cu Gabinete Evelyn Wever-Croes 2 kier goberna, pero sigur e ta mustra riba e realidad cu como Evelyn Wever-Croes como formador a entrega e miembronan di Conseho di Ministro, cu e ta presidi, un encargo nacional dificil.
Pa comprende e tarea y exigencianan cu Evelyn Wever-Croes a acepta, mester analisa pakico Pueblo di Aruba a mustra cu e kier Evelyn Wever-Croes como e persona cu ta dirigi e gobernacion diario, e gobernacion ehecutivo, di Aruba.
Kico Aruba ta pensa di Evelyn Wever-Croes a bini dilanti den e encuesta despues di e debate entre tur partido politico di Aruba, manera organisa pa Camara di Comercio.
E encuesta a demostra cu un mayoria di Aruba tin confiansa cu Evelyn Wever-Croes por hiba Aruba den e rumbo cu Pueblo di Aruba ta desea.
E encuesta ya a presenta e opinion di Pueblo riba e trabou cu Evelyn Wever-Croes a dirigi como Presidente di e Conseho di Ministro cu a pasa den mas turbulencia historico cu dianan di paz.
E prome paso cu Gabinete Wever-Croes mester a dal, tabata introduccion di medidanan impopular manera aumento di belasting pa scapa Aruba for di estado di bancarota.
Gabinete Wever-Croes mester a baha gasto, deshaci di bolo politico pa haya voto.
Na mes momento, Evelyn Wever-Croes a duna Pueblo e prueba cu e no mester a bira abogado di profesion pero mester a busca un trabou na nivel di diplomatico, pasobra continuamente e mester a duna prueba di su talento diplomatico pa atende cu Hulanda, evita welga na departamentonan como arbitro, atende cu problemanan den partidonan di coalicion.
Finalmente Covid-19 mes a bati na porta hustamente ora Aruba a yega na cifranan cu segun Reino tabata porfin un posibilidad pa Florin Arubano sobrevivi.
Ta a base di e Evelyn Wever-Croes na careda, Aruba den un situacion cu lo a manda cualquier Prome Ministro cas sin pordon den eleccion, a dicidi cu e kier pa Evelyn Wever-Croes keda na mando y asina dirigi Aruba cu mester cruza e rio pa futuro.
Ora analisa ayera, awe y loke mañan lo trece probablemente, por mira cu tabata tin tur motibo pa politica cambia di rumbo manera formacion di Gabinete Wever-Croes 2 a demostra.
Un formacion cu un participacion maximo di Pueblo, cu como nacion mester drenta un etapa nobo den historia di Aruba.
Hopi di e palabranan cu nos ta trece dilanti awe pa yega na un conclusion, por a wordo presenta durante formacion den DIARIO of na cuakier lugar na Aruba.
Loke pa nos awe ta e conclusion principal ta e hecho, cu como Formador, Evelyn Wever-Croes a entrega su mes un encargo sumamente pisa como Prome Ministro.
El a scucha loke tur organisacion y persona na Aruba kier a trece dilanti pa loke ta trata e gobernacion di Aruba den e proximo temporada.
Evelyn Wever-Croes mes a habri oportunidad pa prensa (pa periodista cu no ta lubida) puntra tur cu a participa na e formacion, kico nan a trece dilanti y kico mester ta parti di e gobernacion nobo.
Awor Evelyn Wever-Croes y su Gabinete tin e tarea sumamente pisa, di tene na consideracion tur loke Pueblo a bisa durante formacion y atende cu tur necesidad cu a bini dilanti.
Un proceso democratico unico y historico ta conclui awe ora Miembronan nobo di Conseho di Ministro presta nan huramento of priminti cu nan lo traha na interes di Aruba dilanti Gobernador, Representante di Rey den e Gobierno di e pais autonomo.
Aruba ta drenta un etapa nobo. Uno di e momentonan mas significante den su historia, cu ta parti di historia mundial na un momento mundial crucial.
Ta e trabou cu a wordo ehecuta dor di prome dama cu a yega di presidi un Conseho di Ministro di Aruba, Evelyn Wever-Croes, di 2017 pa 2021, ta haci nos conclui cu un Aruba uni, lo sobrevivi e lama bruto di historia y alcansa un futuro den cual nos hobennan por sigui construi e cas autonomo Aruba!
