Na Aruba tur cos ta posibel! - * Autoridadnan mester tin atencion riba ofertanan peligroso
ORANJESTAD (AAN): Tin hendenan riba Facebook cu ta kere cu nan ta masha creativo den marketing of cu ta kere cu nan ta entrepreneur of algo similar.
E problema di esaki ta cu tambe, mescos cu e asina yama 'fake news', tin hende cu ta kere den tur cos cu nan ta lesa of wak riba social media.
Esaki a bira mas y mas evidente den e ultimo aña cu Covid-19, ora cu hende a cuminsa plama noticianan falso relaciona cu remedinan cu segun nan ta cura e virus. Sinembargo, esaki ta algo cu ainda ta wordo mira aki of aya y cu lamentablemente hopi hende ta kere y ta bay tras di e informacionnan aki.
Tambe, por a mira hopi usuario di Facebook, cu no tin nada di haci y cu ta purba 'play inocente' pa otronan cay.
Tin cu ta 'play kens' tambe, otronan cu kier 'play payaso', pero loke si comunidad mester tene cuenta cu ne ta e peliger cu e publicacionnan aki ta significa.
Ban pone algun ehempel. Wak e publicacion aki cu tabata circula den weekend riba Facebook.
Un tal Zeykel Perez, cu Dios sa si esey ta su nomber of ta trata di un 'fake account', tabata ofrece un puiro roos bisando cu ta pa uzo medicinal pa cura verkoud. Te hasta prijs pa gram el a menciona.
Pero, e situacion tristo y peligroso di esaki ta cu ta conoci cu tin un famoso droga conoci como 'Tusi' of cocaina roos. Esaki ta un droga nobo cu a daña e bida di hopi hoben. E droga aki tambe ta wordo conoci cu e nombernan di 'Venus', 'Erus', 'Nexos' of 'Tucibi' (2CB).
Ta trata di un droga sintetico cu ta causa efectonan psicodelico den e persona cu ta consumi'e y cu por altera su sentidonan. Su efectonan ta hopi parecido na e atakenan di miedo/panico cu e droga LSD ta causa.
Ta papiando akinan di un droga hopi peligroso.
Hopi hende a haci joke refiriendo na e publicacion cu e persona aki a pone riba diferente pagina di 'vraag en aanbod' cu tin pa Aruba.
Tin hende cu a reacciona mesora bisando cu esey ta 'tusi'. Otronan a sigui comenta estupideznan manera ta conoci riba e tipo di publicacionnan aki.
Sinembargo, lo ta bon pa e instancianan concerni, como tambe autoridad cuminsa actua. A bira tempo ta stop cu e cosnan aki cu ta pone den peliger bida di hende of e bienestar di hopi hoben cu ta cay den e 'trampanan' aki.
Na Aruba tin hende cu ta kere den hopi storia falso y ta facil pa cay den esun aki cu ta trata di un puiro pa verkoud. Na otro banda tin e hobennan cu ta esnan mas vulnerabel y cu tambe por cay den e weganan aki riba Facebook.
Otro posibilidad ta cu hende por bay kere cu un puiro roos cu ta wordo bendi na e lugarnan unda ta bende matanan, flor y cosnan pa hardin, cu ta pa yuda e matanan saca flor of haya fortaleza pa crece, cu esey ta e puiro roos ey cu a wordo menciona pa cura verkoud. Tur cos ta posibel.
Wel, esaki ta djis un yamada di alerta na comunidad, pero mas cu tur cos na e instancianan concerni manera FADA y Polis pa tene cuenta cu loke ta pasando rond y cu posibelmente ningun hende kier papia riba dje pero cu mester di atencion.
Tin cosnan cu no por acepta y e libertad aki di publica y ofrece kico cu ta riba social media a bira un problema hopi serio na Aruba.
