“Esun cu compara eleccion di Aruba cu Venezuela mester ta serio, si”

Premier Evelyn Wever-Croes a expresa:

*Tur hende por confia den e sistema democratico di Aruba 

ORANJESTAD (AAN) – Minister Presidente mr. Evelyn Wever-Croes, y alavez lider di Partido Electoral di Pueblo, den entrevista cu DIARIO a menciona cu MEP ta bon prepara caba pa e proximo eleccion na 2025.

            Nan a haci cambionan necesario den ley, y kier a bay mas leu pero no a logra e biaha aki. For di prome cu pandemia el a anuncia caba cu Aruba por bay over pa eleccion digital, pero no a logra e biaha aki, pasobra no a logra di haci inversionnan na tempo door di e pandemia, y mester a cambia e prioridadnan.

            “A bin demasiado critica tambe ora nos a anuncia esaki, y nos a dicidi pa ban hacie stap pa stap. Nos a haci cambionan necesario pa proteha identidad y privacidad di cada votado, pasobra esey ta reglanan internacional awo, y awo tur cos ta wordo prepara pa independiza e Electoral Raad, Conseho Supremo Electoral, pues, independiz’e un poco mas, hacie menos dependiente di Gobierno”, e dignatario a menciona.

            El a indica cu ya caba tin e fondonan aloca y awo nan ta trahando riba un Secretariado pa por sostene e Conseho Supremo Electoral.

“Te ainda ta Censo ta haci tur e trabao ey, pero eigenlijk Conseho Supremo Electoral mester di un Secretariado pa sostene nan. Nan mes ta scoge ken e ta y nan mes ta dicidi kico ta e trabaonan. Esey ta bay tuma lugar e aña aki ainda, prome cu eleccion”, Evelyn Wever-Croes a señala.

            E mandatario a enfatiza cu ken cu hinca den su cabes compara e eleccion di Aruba cu eleccion di Venezuela, mester ta mas serio, si.

            “Y mi ta kere cu Partido AVP, hustamente, ta e partido cu por papia mas di experiencia, pasobra tres aña pasa, ora nan a bisa cu nan no ta confia e conteo di tal urna, pasobra eynan ‘mi tanta cu mi prima di cu eynan nan a vota pa mi y mi no a haya ni un voto’ pero si el a haya e reconteo mes y a keda cero, bo no por bisa cu bo no ta confia e sistema. Tin algo cu por a bay malo, pero no ta e sistema”, e mandatario a recalca.

            El a agrega cu ademas, Partido AVP tabata tin e espacio y a haci uso di dje, y a bay Corte pa exigi pa scucha su preocupacionnan y Corte a scucha nan, y a bise cu nan no tin razon den locual nan ta exigi.

“Kiermen, na Aruba no ta solamente e sistema ta traha bon, Conseho Supremo Electoral ta traha bon, Corte a traha bon. Kiermen, bo sa haya tur garantia cu un pais por brinda bo, bo no a haya bo razon. Pero esey, no kiermen cu bo ta compar’e cu Venezuela”, Minister Presidente a señala.

            El a agrega cu Aruba tin suficiente aspecto regla, suficiente transparencia, suficiente independencia den e Conseho Supremo Electoral, den e Electoral Raad di Aruba, tin e Corte ainda cu por duna su opinion, y tur esey a wordo encamina. “E ora bo por yega na conclusion cu bo no por compar’e cu Venezuela, pasobra na Venezuela no a produci ningun acta; locual a wordo produci ta mustra contrario di locual e regimen ta anuncia, CNE tampoco a duna cara di e actanan, na no por bay Corte, Kiermen bo no por compare cu Venezuela”, Minister Wever-Croes a reitera.

            E dignatario a remarca cu Aruba a bin cu mas garantia awo, mas independizacion di nos Electoral Raad, unda gobierno ta apunta e miembronan cu ta Corte, Algemene Rekenkamer, cu ta apunta e presidente y vicepresidente, loke ta duna tambe mas confianza den e sistema. Esaki pa mustra cu esey ta pasa los di Gobierno. “Nos tin suficiente garantia cu tur hende por confia den e sistema democratico di Aruba”, Premier Wever-Croes a  reafirma.