Estudionan ta mustra cu unda tin mas igualdad y ekidad tin menos violencia domestico

Miangela Ras, director di CEDEHM:

ORANJESTAD (AAN) –  Miangela Ras, Director di e Centro di Desaroyo di Hende Muher (CEDEHM) cual ta un entidad di gobierno, tambe a uni e aña aki hunto cu otro stichting, den e actividad “Oranje de world”.

Ras a splica cu CEDEHM su lema semper ta: Igualdad y ekidad di hende muher y mucha muher den nos comunidad, pasobra tras di estudionan ta mustra cu caminda cu tin mas igualdad y ekidad tin menos violencia domestico.

“E ta hopi importante pa nos, awo cu nos a logra di tin un ‘National gender policy’ y su implementacion, pa nos para keto na esaki y pa nos por bin, e ora ey, cu proyectonan pa nos comunidad aborda e problematica aki”, Miangela Ras a señala.

El a agrega cu violencia contra hende muher no ta un problematica di Aruba so, pero e ta algo mundial, y por ta wak cu ora cu papia di igualdad y ekidad, e ta un dialogo cu tin cu cuminza pa hende compronde pakico ta importante pa genero ta bon defini den nos comunidad. CEDEHM e aña aki HIAS ta bay lanza un serie di poster cu a cuminza dia 19 di November te dia 10 di December, cu ta specificamente pa fortifica locual e a caba di bisa tocante concientiza pueblo.

Nan ta bay haci’e na MFAnan, Cas di Cultura, Biblioteca. Nan ta bay haya un set di poster y esaki ta pa promove e dialogo. El a agrega cu como pueblo mester papia di igualdad y ekidad di genero, y kico ta e diferencia entre e dos conceptonan aki.

El a bisa cu ta hopi importante pa tuma esaki como e base di prevencion di violencia contra hende muher. El a bisa cu esaki ta un desaroyo cu ta tumando lugar pa añanan, specificamente desde e pandemia. “Mi ta haya cu nos como entidadnan gubernamental y no gubernamental a uni, e recursonan a bira menos pero e pasion a bira mas. Mi ta haya cu e pasion di cada trahado a bira mas enfoca riba e causa, y esaki ta haci cu, cu poco recurso nos ta logra hopi. E plan ta pa crece y pa traha cu mas entidadnan gubernamental no gubernamental”, Miangela Ras a conclui.