*Hasta por wordo prohibi di subi Arubus pa semper!
ORANJESTAD (AAN ) – Sannin Daoe, Relacionista Publico di Arubus, a convoca un Conferencia di prensa, Diabierna mainta, en conexion cu e bringamento entre dos hoben, den un unidad di Arubus, Diahuebs.
Sannin Daoe a cuminza pa acentua cu Arubus no ta bay tolera ningun tipo di violencia verbal ni fisico den su busnan, bao di ningun circunstancia.
El a bisa cu tin bastante situacion fastioso tumando lugar den e busnan di Arubus, ultimamente, y esaki ta pasando sea verbal of fisicamente, y Arubus no por acepta esaki.
“Pa Arubus na prome lugar ta e seguridad di nos tahadornan pero tambe di nos pasaheronan. Y esaki ta desde muchanan di scol te adultonan y pensionadonan cu ta uza nos busnan tur dia. Na e momentonan aki nos por bisa cu tin cosnan ta pasando den tur bus, no ta solamente den busnan escolar, y nos kier ta sigur cu tur hende compronde cu Arubus no ta bay acepta e tipo di cosnan aki mas”, Daoe a señala.
El a sigui splica cu na momento cu cosnan asina presenta, ya sea agresion verbal of fisico tuma lugar den bus, Arubus ta bay suspende e servicio na e personanan ey mesora. “Nos ta bay stop nan di subi bus, y dependiendo kico e ta, e por bira pa tempo indefini of cu bo no ta bay subi bus nunca mas.
Sannin Daoe ta pidi mayornan pa papia cu nan yiu si nan ta uza Arubus. Pasobra den caso cu no tin otro manera di yega scol, si e ta parti di e actonan di bringamento den bus y por wordo stroba di subi bus, y e no por yega scol y ta cay riba e mayornan pa zorg pa e yega scol. El a referi tambe na adultonan cu ta uza Arubus pa yega trabao of otro, na momento cu nan wordo prohibi di subi bus pa motibonan manera a menciona, e ta bay bira hopi mas dificil y probablemente, hasta costa hopi mas placa pa transporta.
“Nos kier ta duidelijk cu Arubus conhuntamente cu KPA ta bezig cu un campaña, cual ta bay cuminza pronto, y nos lo bay actua cu man hopi duro riba tur tipo di casonan asina aki. Nos tey pa duna servicio, nos kier haci’e na e miho manera posible pero mas cu tur cos nos kier pa tur hende ta safe y sinti safe tambe den nos busnan”, Relacionista Publico di Arubus Sannin Daoe a subraya.
